ބީއެމްއެލްގެ ރުފިޔާ ކާޑުން ޑޮލަރު ނުކެނޑޭ ގޮތަށް އާދިއްތަ ދުވަހު ހެނދުނު ނިންމި ނިންމުމާ ދިމާކޮށް، މި ސަރުކާރު ބަދަލުކުރަން މަސައްކަތް ކޮށްފައިވާ ކަމަށް ބެލުމުގެ ޖާގަ އޮތް ކަމަށް ބުނެ، ފުލުހުން ވަނީ އެ މައްސަލަ ތަހުގީގު ކުރަން ފަށައިފަ އެވެ. \
ބީއެމްއެލްގެ ނިންމުމާ އެކު ހިނގާދިޔަ ކަންކަން ތަހުގީގުކޮށް މޫނަކަށް ކަނދުރާއަކަށް ބެލުމެއް ނެތި ފިޔަވަޅު އަޅުއްވާނެ ކަމަށް ރައީސް ޑރ. މުހައްމަދު މުއިއްޒުވެސް ވަނީ ވިދާޅުވެފަ އެވެ.
މިކަމާއި ގުޅިގެން އިދިކޮޅު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ޕާޓީގެ ޗެއާޕާސަން ފައްޔާޒް އިސްމާއިލް ވިދާޅުވީ ފުލުހުންގެ މުއައްސަސާ މިނިވަން ތަނަކަށް ހެދުމަށް އެމްޑީޕީގެ ނިމިދިޔަ ސަރުކާރުގެ ފަސް އަހަރު ބޮޑެތި މަސައްކަތްތަކެއް ކޮށްފައިވާނެ ކަމަށެވެ. އެކަމަކު އިއްޔެއަކީ ރާއްޖޭގެ ފުލުހުންނަށް ވަރަށް ލަތުވެތި ދުވަހެއް ކަމަށާއި ފުލުހުންގެ އިދާރާގެ ހުރުމަތް ހިފެހެއްޓުމަށްޓަކައި ޝުޖާއު އިސްތިއުފާ ދެއްވަން ޖެހޭ ކަމަށް އޭނާ ވިދާޅުވި އެވެ.
އެއީ ސިޔާސީ ޕޯޑިއެމްއެއްގައި އެކަނި ދައްކާލި ވާހަކައަކަށްވިނަމަ މިއަދު އިދިކޮޅުން ނިކުމެ އެވާހަކައިގެ ލަދުވެތިކަން ކިޔައިދޭން ނުޖެހުނީސްކަން ފާހަގަކުރައްވާ ފައްޔާޒް ވިދާޅުވީ އެކަމަކު ފުލުހުންގެ އިދާރާގެ ތެރެއަށް ވެސް ނުފޫޒު ފޯރުވާ ބަޔާން ނެރޭ ހިސާބަށް ދިއުމުން އެ ވާހަކަ ދައްކަންޖެހޭ ކަމަށެވެ.
މިއަދު އިސްކަންދަރު ކޮށީގައި ހޯމް ލޭންޑު ސެކިޔުރިޓީ މިނިސްޓަރު ނޫސްވެރިންނާ ބައްދަލު ކުރައްވައި، ވިދާޅުވީ އެ މައްސަލަ ތަހުގީގު ކުރަން ނިންމުމުން ޕޮލިސް ކޮމިޝަނަރުގެ އިސްތިއުފާ އަށް ގޮވާލާފައިވާތީ އެކަން ކުށްވެރިކުރައްވައިފަ އެވެ. އޭނާ ވިދާޅުވީ އެއީ ވަރަށް ގައިރު ޒިންމާދާރު ކަމެއް ކަމަށެވެ.
އޭނާ ވަނީ ސިޔާސީ ކަންކަމުގެ ތެރެއަށް ފުލުހުންގެ މުވައްސަސާ ނުވެއްދުމަށް އެދިވަޑައިގެންފަ އެވެ. އިހްސާން އިތުރަށް ވިދާޅުވީ ފުލުހުން މިމައްސަލަ ތަހުގީގު ކުރާނެ ކަމަށާއި މިއީ އެއްވެސް މީހަކު ހާސްވެ ފިކުރު ބޮޑުވާންޖެހޭ ކަމެއް ނޫން ކަމަށެވެ.
