މިކަމަށް ބޭއްވި ރަސްމިޔާތު މިއަދު ކުރިއަށްގެންގޮސްފައިވަނީ ސްރީލަންކާގެ ވެރިރަށް ކޮލަމްބޯގައި، އެގައުމުގެ ސަރުކާރުގެ ފަރާތުންނެވެ.
އިންޑިއާގެ ޕްރައިމް މިނިސްޓަރުގެ ނޭޝަނަލް ސެކިއުރިޓީ އެޑްވައިޒާ އަޖިތް ޑޮވާލް، ރާއްޖޭގެ ނޭޝަނަލް ސެކިއުރިޓީ އެޑަވައިޒާ އިބްރާހީމް ލަތީފް، ސްރީލަންކާއަށް ކަނޑައަޅުއްވާފައިވާ ހުންނަ މޮރިޝަސްގެ ހައިކޮމިޝަނާ ހޭމަންޑޮޔާލް ދިލުމް އަދި ލަންކާގެ ރައީސްގެ ނޭޝަނަލް ސެކިުރިޓީ އެޑްވައިޒަރު ސަގާލާ ރަތްނަޔާކޭ ވަނީ އެއްބަސްވުމުގެ ލިޔެކިޔުންތަކުގައި މެމްބަރު ގައުމުތަކުގެ ފަރާތުން ސޮއިކޮށްފަ އެވެ.
ސީއެސްސީގެ މައިގަނޑު މަގުސަދަކީ މެމްބަރު ގައުމުތަކަށް އާންމުކޮށް ކަންބޮޑުވާ ޓްރާންސްނޭޝަނަލް ނުރައްކާތަކާއި ގޮންޖެހުންތަކަށް ހައްލެއް ހޯދައިދީ ސަރަހައްދީ ރައްކާތެރިކަން ކުރިއެރުވުމެވެ.
ސީއެސްސީގެ ދަށުން އެއްބާރުލުން ދިނުމުގެ ފަސް ތަނބެއް ވެއެވެ. އެއީ މެރިޓައިމް ސޭފްޓީ އެންޑް ސެކިއުރިޓީ، ޓެރަރިޒަމާއި ރެޑިކަލައިޒޭޝަންއާ ދެކޮޅަށް މަސައްކަތްކުރުން، ޓްރެފިކިން އާއި ޓްރާންސްނޭޝަނަލް އޯގަނައިޒްޑް ކްރައިމްއާ ދެކޮޅަށް މަސައްކަތްކުރުން، ސައިބާ ސެކިއުރިޓީ އެންޑް ޕްރޮޓެކްޝަން އޮފް ކްރިޓިކަލް އިންފްރާސްޓްރަކްޗާ އެންޑް ޓެކްނޮލޮޖީ އަދި އިންސާނީ އެހީތެރިކަމާއި ކާރިސާތަކުގައި އެހީތެރިވުން ހިމެނެއެވެ.
ސޮއިކުރުމުގެ ރަސްމިޔާތު ނިންމާލާފައިވަނީ ދެން އަޅަންޖެހޭ ފިޔަވަޅުތަކާއި ކުރިއަށް އޮތް ކޮންކްލޭވްގެ ހަރަކާތްތަކާ ބެހޭގޮތުން ވަފުދުތަކުގެ އިސްވެރިންގެ މެދުގައި މަޝްވަރާކޮށްގެންނެވެ.
އެ ޖަމިއްޔާގައި ބައިވެރިވުމުގެ ފުރުސަތު ބަންގްލަދޭޝް އާއި ސީޝެލްސްއަށް ވެސް ވަނީ ދީފަ އެވެ.
