ސަންގު ޓީވީއަށް ދެއްވި އިންޓާވިއުއެއްގައި ރައީސް މުއިއްޒު ވިދާޅުވީ ބްރިޖުގެ މަސައްކަތް ރަސްމީކޮށް އެ މަނިކުފާނާއި ހަވާލުކުރީ 2014ގެ ސެޕްޓެމްބަރު އޮކްޓޫބަރު ހިސާބުގައިކަމަށާއި އެހިސާބުން ފެށިގެން ހިނގި ހުރިހާކަމެއް އެނޑިވަޑައިގަންނަވާކަމަށެވެ.
އޭގެ ފަހުން އެ މަސައްކަތުގެ އެއްވެސް ކަމަކަށް ބަދަލެއް އައިސްފައިނުވާކަމަށާއި ބްރިޖު ނިމިފައިއެވަނީ ކުރެހުމުގައި އޮތްގޮތަށް މަސައްކަތް ހަވާލުކުރިއިރު އޮތްގޮތަށް ކޮޅަށް ދެ ލޭން ހިމެނޭގޮތަށް ކަމަށް ރައީސް ޑރ. މުއިއްޒު ވިދާޅުވިއެވެ.
ބްރިޖުން ލޭނެއް މަދުވެގެން ރައީސް ޔާމީން އެއްޗެތި ކިޔުއްވިކަމަށް ރައްޔިތުން މަޖިލީހުގައި ރަޢީސް އަބްދުއްރަހީމް ދެއްކެވި ވާހަތަކުގައި ތަފްސީލު ރައީސް މުއިއްޒު ވަނީ ދެއްވާފައެވެ. އެމަނިކުފާނު ވިދަޅުވީ ބްރިޖުގެ މަސައްކަތް ނިމި ހުޅުވަން ހަފްތާއަކަށް ވެފައިވަނިކޮށް ރައީސް ޔާމިން ބްރިޖް ކޮމެޓީއާ ބައްދަލުކުރެއްވިކަމަށެވެ. އަދި ބްރިޖުގައި ސައިކަލް ދުއްވަން ވަކި ލޭނެއް ނެތިގެން އެކަމާއި ހިތްހަމަނުޖެހުން ފާޅުކުރެއްވިކަމަށާއި ބްރިޖު ހުޅުވުން ކެންސަލް ކުރަންވެސް އެންގެވިކަމަށެވެ. އެކަން އެގޮތަށް އެންގުމުން ސަފީރާއި ވާހަކަދައްކާ އެކަން ކުރެވޭތޯ ބެއްލެވިކަމަށާއި އެކަން އެގޮތަށް ނުވީ ބްރިޖުގެ މަސައްކަތް ނިމިފައި އޮތުމުންކަމަށްވެސް ރައިސް މުއިއްޒު ވިދާޅުވިއެވެ.
ބްރިޖުގެ ބައިސްކަލް ލޭން ސައިކަލް ލޭނަކަށް ބަދަލުކުރަން ވިދާޅުވުމުން އެތަނުގައި ސައިކަލް ދުއްވޭނެތޯ ބަލަން ރައީސް އޮފީސް ކޮރިޑޯ ތެރެއަށް ސައިކަލެއް ވައްދައިގެން އެކަން ކުރެވޭތޯ ބެއްލެވިކަމަށްވެސް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ބްރިޖު ހުޅުވަން އޮތް ދުވަހަށް ހުޅުަވަން ރައީސް ޔާމީން އެއްބަސްވެޑައިގަތީ އެމަނިކުފާނު ގެޔަށް ވަޑައިގަތުމުން ފޯނުން ގުޅާ އެކު ގޮތްގޮތަށް ވާހަކަ ދެއްކެވުމުންކަމަށެވެ.
