މި މިޝަންގެ ދަށުން، ވޯލްޑް ބޭންކުގެ ޓީމުން ބަލަމުންދަނީ "މޯލްޑިވްސް ކްލީން އެންވަޔަރަމެންޓް ޕްރޮޖެކްޓް"ގެ ދަށުން ކުރެވެމުންދާ މަސައްކަތްތަކުގެ ޖުމްލަ ކުރިއެރުންކަމަށް އެންވާރަމަންޓް މިނިސްޓްރީން ބުނެއެވެ. އެގޮތުން ޒޯން 4 އާއި 5 ގައި ގާއިމްކުރެވެމުންދާ ކުނި މެނޭޖްކުރުމުގެ ނިޒާމުތަކާއި، އެ ނިޒާމުތައް ގާއިމްކުރުމަށް ފޯރުކޮށްދެވިފައިވާ ވަސީލަތްތައް ހިމެނޭކަމަށް އެ މިނިސްޓްރީން ބުނެއެވެ.
އެންވާރަމަންޓް މިނިސްޓްރީން މައުލޫމާތުދޭގޮތުގައި ވޯލްޑް ބޭންކުގެ ޓީމުން ޕްރޮޖެކްޓް މެނޭޖްމަންޓް ޔުނިޓާ އެކު ލ. އަތޮޅުގެ ފޮނަދޫ، ގަން އަދި މާމެންދޫއަށް ޒިޔާރަތްކޮށް، އެ ރަށްރަށުގައި ކުރިއަށްދާ ކުނި މެނޭޖްކުރުމުގެ މަރުކަޒުތަކުގެ މަސައްކަތް ބަލައި ދިރާސާކުރަމުން ދާކަމަށްވެސް ބުނެއެވެ.
މި ދަތުރުގައި، ވޯލްޑް ބޭންކުގެ ޓީމުން ރަށު ކައުންސިލްތަކުގެ މެންބަރުންނާއި އެހެނިހެން ފަރާތްތަކާ ބައްދަލުކޮށް، މި ނިޒާމުތައް ހިންގުމަށް ރޭވިފައިވާ ގޮތްތަކާ ބެހޭގޮތުން މަޝްވަރާކުރުމަށް ހަމަޖެހިފައިވާއިރު މި ދަތުރު ކުރިއަށްދާނީ މިމަހުގެ 1 އިން މިއަދުގެ ނިޔަލަށްކަމަށް އެ މިނިސްޓްރީން ބުނެއެވެ.
ވޯލްޑް ބޭންކުގެ ޓީމާއެކު މި ދަތުރުގައި ބައިވެރިވަނީ މޯލްޑިވްސް ކްލީން އެންވަޔަރަމެންޓް ޕްރޮޖެކްޓްގެ ޕްރޮޖެކްޓް މެނޭޖަރު، ޕްރޮޖެކްޓް ކޯޑިނޭޓަރުން، ސޭފްގާޑް ސްޕެޝަލިސްޓް އަދި ކޮމިއުނިކޭޝަން ސްޕެޝަލިސްޓެކެވެ. އަދި މި މަޝްރޫއުގެ ދަށުން ކުރެވޭ މަސައްކަތްތަކަކީ "މަގޭ ސާފު ރާއްޖެ" ގެ ޝިއާރުގެ ދަށުން ކުރެވޭ މަސައްކަތްތައްކަމަށް އެންވާރަމަންޓް މިނިސްޓްރީން ބުނެއެވެ.
