މޯލްޑިވްސް ފުޑް އެންޑް ޑްރަގް އޮތޯރިޓީން މިކަމާ ގުޅޭ އައު އުސޫލެއް އާންމު ކޮށްފައިވާތީ ބިޒްނަސް ސެންޓާ ކޯޕޮރޭޝަން (ބީސީސީ)އިން އެކަމާ ގުޅޭގޮތުން މިއަހަރުގެ ފެބްރުއަރީ 19ގައި އާންމުކޮށްފައިވާ އިއުލާން މިހާރު ބާތިލް ކޮށްފައިކަމަށް އެ ކޯޕޮރޭޝަންއިން ބުނެއެވެ.
ކާބޯތަކެތީގެ ރައްކާތެރިކަމާ ގުޅޭ ގާނޫނުގެ ދަށުން އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކުމުގެ މަސައްކަތްކުރާ ފަރާތްތައް އެމްއެފްޑީއޭގައި ދަފްތަރުކުރާ ގޮތަށް ހަމަޖެހިފައިވުމުގެ ސަބަބުން ބީސީސީގެ "އާމްދަނީ ހޯދުމަށްޓަކައި ގޭގައި އުފައްދާ ބަންދުކުރާ ފަރާތްތަކުގެ ދަފްތަރު" މިހާރު ވަނީ އުވާލާފައިކަމަށް އެ ކޯޕޮރޭޝަނުން މައުލޫމާތުދެ އެވެ.
ބީސީސީއިން ބުނިގޮތުގައި އެފަދައިން ނިންމުމުގެ މަގްސަދަކީ އެފަދަ މަސައްކަތް ކުރާ ފަރާތްތަކުން ހިދުމަތް ހޯދުމަށް ޓަކައި ފޯމު ހުށަހެޅުމުގެ މަރުޙަލާގައި އިތުރު ހަރުފަތެއް ގިރާކުރަން ނުޖެހި، ހިދުމަތް ހޯދުމުގައި އެންމެ ލުއި ފަސޭހަ ވާނެ ގޮތަކަށް އުސޫލު ބައްޓަން ކުރުމުގެ ގޮތުންކަމަށެވެ.
މޯލްޑިވްސް ފުޑް އެންޑް ޑްރަގް އޮތޯރިޓީން އާންމުކުރި "އަމިއްލަ ދިރިއުޅުމަށްޓަކައި ކާބޯތަކެތި އުފައްދައި ވިއްކުމުގެ މަސައްކަތުގައި އަމަލު ކުރަންވީ ގޮތުގެ މިންގަނޑު"ގައިވާ ގޮތަށް އެ އޮތޯރިޓީން އެ ހިދުމަތް ހޯދުމަށް ރަޖިސްޓާ ކުރަން ޖެހޭނީ މިހާރުވެސް އަމަލު ކުރަމުންދާ ގޮތަށް "ދިރިތި" ޕޯޓަލް މެދުވެރި ކޮށެވެ.
ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ބޭނުންވާ އެހީތެރިކަން ފޯރުކޮށްދީ ވިޔަފާރިތައް ކުރިއެރުވުމަށްޓަކައި ބިޒްނަސް ސެންޓާ ކޯޕަރޭޝަނުން ދަނީ ކަމާ ގުޅުންހުރި ފަރާތްތަކާއި ގުޅިގެން ގިނަ މަސައްކަތްތަކެއް ކުރަމުން ކަމަށް އެ ކޯޕޮރޭޝަނުން ބުނެ އެވެ.
