މިދިޔަ ހަފްތާގައި ދެ އެކްސިޑެންޓެއްގައި 48 ގަޑިއިރުގެ ތެރޭގައި ދެ ޒުވާނަކު މަރުވުމުން މާލޭ ސަރަހައްދުގައި އެންމެ ގިނައިން އެކްސިޑެންޓް ހިނގާ މަގުތަކުގައި 24 ގަޑިއިރު ފުލުހުން ފޯރިމަރަން ވަނީ ފަށާފައެވެ.
ފުލުހުން ބުނީ އެ އިދާރާއިން މަގުތަކުގައި ފޯރިމަރަން ނުކުން ފަހުން 24 ގަޑިއިރުގެ ތެރޭގައި ނުރައްކާތެރިކޮށް ސައިކަލް ދުއްވި 5 މީހަކު ހިފަހައްޓާފައިވާކަމަށެވެ. އަދި 30 ކާރާއި 220 ސައިކަލް ހުއްޓުވާ ބަލާ ފާސްކޮށްފައިވާކަމަށެެވެ. އަދި ގަވައިދުތަކާއި ހިލާފުވެގެން 2 ކާރަކާއި ސައިކަލް ދުއްވި 53 މީހަކަށް ފިޔަވަޅު އަޅާފައިވާކަމަށެވެ.
ފުލުހުން އާއްމުކޮށްފައިވާ ތަފާސް ހިސާބުތަކުން ދައްކާ ގޮތުން މިމަހުގެ 8 ވަނަދުވަހުގެ އިރުއޮއްސި ހަޔަކުން ޖެހިގެން އައި ދުވަހުގެ އިރު އޮއްސި ހަޔަކަށް 3 ކާރާިއ 14 ސައިކަލް ޓޯ ކޮށްފައިވާކަމަށެވެ. އަދި ލައިސަން ނެތި ދުއްވި 8 މީހަކު ހިފަހައްޓާފައިވާއިރު ގަވައިދާ ހިލާފަށް އުޅަނދު ދުއްވި 37 މީހަކަށް ނަސޭހަތް ދިނުމަށްފަހު ދޫކޮށްލާފައިވާކަމަށްވެސް ފުލުހުން ބުނެއެވެ،
އިތުރަށް ކިޔާލުމަށް ؛ އެކްސިޑެންޓް ގިނަ މަގުތަކުގައި 24 ގަޑިއިރު ފުލުހުން ފޯރިމަރަން ފަށައިފި
އެންމެ ގިނައިން އެކްސިޑެންޓް ހިނގާކަމަށްް ފުލުހުން ބުނާ މަގުތައް
- ހުޅުމާލޭ ނިރޮޅުމަގު
- ހުޅުމާލޭ ފޭސް ދޭކަށް ދާ ހައިވޭ
- މާލެއިން ބްރިޖް އަރާ ސަރަހައްދު
- ހުޅުމާލެއިން ބްރިޖް އަރާ ސަރަހައްދު
އެކްސިޑެންޓްްތައް މަދުކުރަން ފުލުހުން މަގުމަތީގައި ފޯރިމަރަން ފަށާފައިވާއިރު ހަފްތާ ބަންދުތަކުގައި ހައިވޭތަކާއި މަގުތަކުގައި ވެހިކަލް ޗެކް ޕޮއިންޓު ހަދާ، ބާރު ސްޕީޑުގައި ދުއްވާ މީހުން ހޯދާ ފިޔަވަޅު އަޅާނެކަމަށްވެސް ފުލުހުންގެ ކޮމިޝަނަރު އަލީ ޝުޖާއު ވަނީ ވިދާޅުވެފައެވެ.
