މި މަރުކަޒު މިހާތަނަށް ހިންގަމުން ގެންދިޔައީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ދަށުންނެވެ.
ރައީސް އޮފީހުން ބުނީ ހާއްސަ އެހީއަށް ބޭނުންވާ މީހުންގެ މަރުކަޒު ހިންގުމާއި ބެލެހެއްޓުމުގެ ޒިންމާ މިނިސްޓްރީ އޮފް ހެލްތުގެ ދަށަށް ބަދަލުކުރީ އެކަމާއި ގުޅޭގޮތުން ވަޒީރުންގެ މަޖލީހުގައި މަޝްވަރާކުރެއްވުމަށްފަހު ވަޒީރުން އެގޮތަށް ލަފާދެއްވުމުންކަމަށެވެ.
އަދި މި ބަދަލު ގެންނައީ ހައްސަ އެހީއަށް ބޭނުންވާ މަރުކަޒަކީ ދާއިމީ ބޯހިޔާވަހިކަމެއްގެ ބަދަލުގައި ފަރުވާދީ ރިހެބިލިޓޭޓްކުރާ ތަނެއްގެ ގޮތުގައި ހިންގުމުގެ ނިޒާމަށް ބަދަލު ގެނައުމަށްކަމަށެވެ.
ހާއްސަ އެހީއަށް ބޭނުންވާ މީހުނަށް މަރުކަޒެއް ގާއިމުކޮށް އެތަނުގައި ހިދުމަތް ދޭން ފެށީ 1976 ވަނަ އަހަރުގެ ޖޫންމަހުގެ 6 ވަނަދުވަހުއެވެ. އެ މަރުކަޒުގެ ބެލުމުގެ ދަށުގައި މިވަގުތު 219 މީހުން ތިބިކަމަށް ސޯޝަލް އެންޑް ފެމިލީ މިނިސްޓްރީން ބުނެއެވެ. އޭގެތެރޭގައި 65 އަހަރުން މަތީގެ 31 މީހަކު އެ މަރުކަޒުގައި އެބަ ތިއްބެވެ.
