ރައީސް އޮފީހުން ބުނީ އީސީގެ މެމްބަރު ކަމަށް ކުރިމަތިލާން ހުޅުވައިލީ މިހާރު ކޮމިޝަންގައި ތިއްބެވި މެމްބަރެއްގެ ތެރެއިން މެމްބަރެއްގެ ދައުރު ހަމަވާތީ ކަމަށެވެ.
އީސީގެ މެމްބަރު ކަމަށް ކުރިމަތިލާން ޝައުގުވެރިވާ މީހުންނަށް މި މަހުގެ 23 އާ ހަމައަށް ވަނީ ހުޅުވާލައިފަ އެވެ. މެމްބަރު ކަމަށް ކުރިމަތިލެވޭނީ އުމުރުން 25 އަހަރުވެފައިވާ އިސްލާމް ދީނުގައި ޙައްދެއް ކަނޑައެޅިފައިވާ ކުށެއް ކުރިކަން ވޭތުވެ ދިޔަ ފަސް އަހަރު ދުވަހުގެ ތެރޭގައި ޝަރީޢަތަށް ސާބިތުވެފައި ނެތް އަދި އިންތިހާބު ކުރެވޭ ނުވަތަ އައްޔަންކުރެވޭ ސިޔާސީ މަގާމެއް ފުރަމުން ނުދާ އަދި ސަރުކާރުގެ ނުވަތަ އެހެން ވެސް ތަނެއްގައި ވަޒީފާއެއް އަދާނުކުރާ މީހުންނަށެވެ.
މީގެ އިތުރުން މެމްބަރު ކަމަށް ކުރިމަތިލާ މީހުންނަކީ ސިޔާސީ ޕާޓީއެއްގެ މެމްބަރަކަށް ނުވުމާއި ސިޔާސީ ހަރަކާތްތަކުގައި ނޫޅޭ މީހަކަށް ވެސް ވާން ޖެހެ އެވެ.
އިލެކްޝަންސް ކޮމިޝަންގެ މެންބަރުކަމުގެ މަޤާމަށް ކުރިމަތިލުމަށް އެދޭ ފޯމު ރައީސްގެ އޮފީހުގެ ރިސެޕްޝަނުން ލިބެން ހުންނާނެ ކަމަށާއި އަދި ރައީސްގެ އޮފީހުގެ ވެބްސައިޓުން ފޯމް ޑައުންލޯޑް ކުރެވޭނެކަމަށްވެސް އެ އޮފީހުން ބުންޏެވެ.
އިލެކްޝަންސް ކޮމިޝަނުގެ ރައީސް ފުއާދު ތައުފީގުގެ ދައުރު ހަމަވާނީ އަންނަ ނޮވެމްބަރު މަހުގެ 23 ވަނަ ދުވަހަށެވެ. އެއާއެކު ކޮމިޝަނުގައި މެންބަރުގެ މަގާމާއި ރައީސްގެ މަގާމު ހުސްވާނެ އެވެ.
