ގާނޫނީ ވަކީލަކަށް ފިޔަވަޅު އަޅާނެ ކަމުގެ އިންޒާރު ކްރިމިނަލް ކޯޓުން ދިނީ، މަސްތުވާތަކެތީގެ މައްސަލައެއްގައި ހައްޔަރުކޮށްފައިވާ ބިދޭސީއެއްގެ މައްސަލައިގައި، އެ ވަކީލު ކޯޓަށް އެއްބާރުލުން ނުދިނުމުންނެވެ.
މަސްތުވާތަކެތީގެ މައްސަލައެއްގައި ހައްޔަރުކޮށްފައިވާ ބަންގްލަދޭޝް މީހެއްގެ ބަންދާ މެދު މިއަދު ގޮތެއް ނިންމާފައިވާއިރު، އެ ނިންމުމުގައި ގާޒީވަނީ ވަކީލު އެއްބާރުލުން ނުދޭކަން ފާހަގަ ކުރައްވާފަ އެވެ. އެހެންނަމަވެސް އެއީ ކޮން ވަކީލެއްކަމެއް އެނގިފައެއް ނުވެ އެވެ.
ކްރިމިނަލް ކޯޓުގެ ގާޒީ އައިޝަތު ނުޒުހާ ވިދާޅުވެފައިވަނީ އެންމެ ފުރަތަމަ ބަންދު މަޖިލީހަށް ވަކީލު "އޯކޭ" ދެއްވުމަށް ފަހު، ތަކުރާރުކޮށް ގުޅައި އަދި މެސެޖުވެސް ކުރުމުން މިއަދު ބަންދު މަޖިލީހުގައި ބައިވެރިވެވެން ނެތް ކަމަށް އަންގާފައިވާ ކަމަށެވެ. މިކަމާ ގުޅިގެން އެފަދަ ކަންކަން ތަކުރާރުވާނަމަ ވަކީލަށް ފިޔަވަޅު އެޅޭނެކަން އަންގާފައިވާ ކަމަށް ބަންދު އަމުރުގައި ގާޒީ ބަޔާން ކުރައްވާފައިވެ އެވެ.
މި މައްސަލައިގައި ހައްޔަރު ކުރި ބަންގްލަދޭޝް މީހާގެ ބަންދަށްވަނީ 15 ދުވަސް ޖަހާފަ އެވެ. އެ ބަންގްލަދޭޝް މީހާގެ އަތުން ފެނުނު މަސްތުވާތަކެތި ޓްރެފިކިން މިންގަނޑަށް އަރާކަން ގާޒީ ވަނީ ފާހަގަ ކުރައްވާފަ އެވެ.
