މިދިޔަ މަހުގެ 9 ވަނަ ދުވަހު ހިނގި އަލިފާނުގެ ހާދިސާއަށްފަހު، ހ. ދޫހިމެރިގެ ތަޅާލުމުގެ މަސައްކަތް ނިންމައި، އެ ސަރަހައްދު ސާފުކޮށް ނިންމައިފިއެވެ. މި މަސައްކަތް ކުރިއަށް ގެންދިޔައީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގެ އާންމު މަސައްކަތްތަކާބެހޭ ޑިޕާޓްމަންޓުންނެވެ.
އަލިފާނުގެ ހާދިސާގައި މުޅިން އަނދާ ހުލިވި ދޫހިމެރިގޭގައި ދިރިއުޅުނު 15 ބިދޭސީންނަށް ވަގުތީ ބޯހިޔާވަހިކަން ދެވުނެވެ. އަދި އިންވެގެން ހުރި ގެތަކުގެ ބައެއް ޢާއިލާތަކަށް ވެސް ވަގުތީ ބޯހިޔާވަހިކަން ފޯރުކޮށްދެވުނެވެ. މިހާރު އެ ފަރާތްތަކުގެ ދާއިމީ ހިޔާވަހިކަމުގެ އިންތިޒާމްތައް ދަނީ ހަމަޖައްސަމުންނެވެ.
ހާދިސާގައި އެއްވެސް މީހަކަށް ބޮޑު ގެއްލުމެއް ލިބިފައެއް ނުވެއެވެ. ނަމަވެސް ދުމުގެ އަސަރުކޮށްގެން 2 ބިދޭސީންނަށް ހޮސްޕިޓަލުގައި ފަރުވާ ދޭންޖެހުނެވެ. މަސައްކަތް ނިމުމާއެކު، ދޫހިމެރިމަގު އާންމުންނަށް ހުޅުވާލެވިފައިވާކަން ފާހަގަކޮށްލެވެއެވެ.
