އެޗްޑީސީން ބުނީ ޕޮކެޓް ޕާކިން ޖާގައިގެ ގޮތުގައި އަށް ޒޯނަކުން 1،374 ޖާގަ އަލަށް އުފައްދާފައިވާކަމަށެވެ.
މި ޖާގަތަކަށް ކުރިމަތިލާން ހުޅުވާލާފައިވާއިރު މިއިން ކޮންމެ ޖާގައެއްގެ މަހު ކުއްޔަކީ 2000 ރުފިޔާކަމަށް އެޗްޑިސީން ބުނެއެވެ. އަދި މި ޖާގަތަކުގައި ކާރާއި ޕިކަޕް ފަދަ ހަތަރު ފުރޮޅުލީ އުޅަނދުތައްވެސް ޕާކުކުރެވޭނެކަަމަށް އެޗްޑީސީން ބުނެއެވެ.
އެ ކޯޕަރޭޝަނުން ބުނީ 18 އަހަރުވެފައިވާ ކޮންމެ ދިވެއްސަކަށްވެސް މި ޕާކިން ޖާގަތަކަށް ކުރިމަތިލެވޭނެކަމަށެވެ. އަދި ޕާކިން ޖާގައަށް އެދޭ ފަރާތުގެ ނަންމަތީގައި، މާލޭ ސަރަހައްދަށް ރަޖިސްޓްރީކޮށްފައިވާ ކެޓަގަރީ B1 ނުވަތަ C1 ގެ ވެހިކަލްއެއް އޮންނަންޖެހޭނެކަމަށާއި އަދި ޕާކިން ހޯދަން އެދޭ ފަރާތަކީ މާލޭ ސަރަހައްދުގައި ދިރިއުޅޭ ފަރާތަކަށްވެސް ވާންޖެހޭނެކަމަށްވެސް އެޗްޑީސީން ބުނެއެވެ.
ޕާކިން ޖާގަތައް ދޫކުރުމުގައި ފުރަތަމަ އިސްކަންދޭނީ ހުޅުމާލެއަށް ރަޖިސްޓްރީކޮށްފައިވާ ވެހިކަލްތަކަށްކަމަށް އެޗްޑީސީން ބުނެއެވެ. ހުޅުމާލެ ފިޔަވައި މާލެ ސަރަހައްދަށް ރަޖިސްޓްރީކޮށްފައިވާ އެހެން ވެހިކަލްތަކަށް ޕާކިން ޖާގަ ދޫކުރަން ނިންމާފައި ވަނީ އެ ވެހިކަލްތަކަށް ފަހު ކަމަށްވެސް އެ ކޯޕަރޭޝަނުން ބުނެއެވެ.
މި ދެ ކެޓަގަރީންވެސް ޕާކިން ޖާގަ ދޫކުރުމުގައި އިސްކަންދޭ ތަރުތީބަކީ
- ޕާކިން އެޕްލިކޭޝަން ހުށަހަޅާފައިވާ ޒޯންގައި ދިރިއުޅޭ ހުޅުމާލޭގެ ރައްޔިތުން
- ޕާކިން އެޕްލިކޭޝަން ހުށަހަޅާފައިވާ ޒޯން ނޫން އެހެން ޒޯނެއްގައި ދިރިއުޅޭ ހުޅުމާލޭ ރައްޔިތުން
- މާލޭ ސަރަހައްދުގައި (ހުޅުމާލެ ނުހިމަނާ) ދިރިއުޅޭ ރައްޔިތުން
ޕާކިން ޖާގަތައް ދޫކުރާނީ އެ ޖާގަތަކަށް ކުރިމަތިލާ ފަރާތްތަކުގެ ތެރެއިން، ޝަރުތު ހަމަވާ ފަރާތްތަކުގެ މެދުގައި ގުރުއަތު ލައިގެންކަމަށް އެޗްޑިސީން ބުނެއެވެ.
މި ޕާކިން ޖާގަތަކަށް ކުރިމަތިލާން ބޭނުންވާ ފަރާތްތަކަށް އެ ފުރުސަތު އަންނަމަހުގެ 1 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
