ބީއެމްއެލްގެ އާ ބޯޑުގެ ޗެއާޕާސަނަކަށް އައްޔަންކޮށްފައިވަނީ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ކެބިނެޓް އެފެއާޒްގެ މަގާމުގައި ހުންނެވި އަހްމަދު އަލީ ހަބީބްއެވެ.
ބޭންކުން ބޭއްވި ހާއްސަގޮތުން ކުރާ އާންމު ޖަލްސާ (އީޖީއެމް) ގައި ވަނީ ސަރުކާރުން ބީއެމްއެލް ޑިރެކްޓްރުންގެ ބޯޑަށް އައްޔަންކުރަން ސަރުކާރުން ފޮނުވި އަލީ އިރުފާން އަދި މުހައްމަދު ޝާހިދު އައްޔަނު ކުރަން ފާސްކޮށްފަ އެވެ.
ސަރުކާރުން ބީއެމްއެލް ބޯޑަށް އައްޔަންކުރި މެމްބަރުން
- ސ. ހިތަދޫ، ނޫވިލާގެ، އަހްމަދު އަލީ ހަބީބު.
- ގ. ސިނަމާލެ 3 35-04، އަލީ ފާރިސް މުހައްމަދު.
- ބ. އޭދަފުށި، ފެންއާރު، އާދިލް މޫސާ.
- . އެމޭޒަން، ޑރ. މަރްޔަމް ސުޒީ އާދަމް.
- ސ. މަރަދޫފޭދޫ، ޑޭލައިޓްވިލާ، އަލީ އިރުފާން.
- ހުޅުމާލެ ފްލެޓް ނަންބަރު 02-2-90، މުހައްމަދު ޝާހިދު
ބީއެމްއެލްގެ ޑިރެކްޓަރުންގެ ބޯޑުގައި ސަރުކާރު ތަމްސީލުކުރާ އައިޝަތު ސަޖުނީ އެ މަގާމުން އިއްޔެ ވަނީ އިސްތިއުފާ ދެއްވާފަ އެވެ.
އަހަރުގެ ކުރީކޮޅު ބީއެމްއެލްގެ ޑިރެކްޓަރުންގެ ބޯޑުން ސަޖުނީ ވަކިކުރުމަށްފަހު، ދެ ދުވަސް ފަހުން އަލުން ބޯޑަށް އައްޔަންކޮށްފައިވެ އެވެ.
މީގެ ކުރިން، މިދިޔަ މަހު ބޭންކުގެ ސީއީއޯ ކާލް ސްޓުމްކަ އަދި ބޯޑު މެންބަރު ޢާއިޝަތު ނޫރައްދީން ވަނީ އިސްތިއުފާދެއްވާފައިވެ އެވެ.
ބީއެމްއެލުން ރުފިޔާ ކާޑުތަކަށް ދެމުން އައި ޑޮލަރު ލިމިޓު އުވައިލުމާ ގުޅިގެން ސަރުކާރާއި ބޭންކާ ދެމެދު ހިޔާލު ތަފާތުވުންތަކެއް އުފެދުނެވެ. މި މައްސަލައާ ގުޅިގެން ރައީސް ޑރ. މުޙައްމަދު މުއިއްޒު ވަނީ ބީއެމްއެލުން ބަގާވާތެއް ކުރަން އުޅުނު ކަމަށް ތުހުމަތުކުރައްވާފަ އެވެ
