ފެނަކައިގެ ޑިރެކްޓަރު އަބްދުލް ވާހިދު މުހައްމަދު ވިދާޅުވި ގޮތުގައި، ކުރީ ސަރުކާރުން ފެނަކައާ ހަވާލުކުރި މި ޕްރޮޖެކްޓްތަކުގެ މަސައްކަތްތައް އެއްބަސްވެފައިވާ ގޮތަށް ކުރިއަށް ނުގެންދެވުމާ ގުޅިގެން، ކޮންސްޓްރަކްޝަން މިނިސްޓްރީއާ ދެމެދު ވެފައިވާ އެއްބަސްވުން ބާތިލުކުރަން ޖެހުނީއެވެ.
ވާހިދު އިތުރަށް ވިދާޅުވި ގޮތުގައި، މި ޕްރޮޖެކްޓްތަކަށް މިހާތަނަށް އެޑްވާންސް ފައިސާގެ ގޮތުގައި 518 މިލިއަން ރުފިޔާ ދޫކޮށްފައިވާއިރު، މަޝްރޫޢަށް ހޭދަކޮށްފައިވަނީ އެންމެ 92 މިލިއަން ރުފިޔާއެވެ. އަދި މި ޕްރޮޖެކްޓްތަކުގެ ހިސާބު ކިތާބު ރަނގަޅަށް ބެލެހެއްޓިފައި ނެތްކަންވެސް ފާހަގަކުރެއްވިއެވެ.
ޕްރޮޖެކްޓްތަކުގެ ހަރަދުތައް އިތުރަށް ބޮޑުވެފައިވަނީ ޒިންމާއާ ނުބައްދަލު މުސާރައިގައި މުވައްޒަފުން ނެގުމާއި، މަސައްކަތަށް ބޭނުންވާ މެޝިނަރީޒް ކުއްޔަށް ނެގުމުގެ ސަބަބުން ކަމަށް ވާހިދު ވިދާޅުވިއެވެ.
ބާތިލުކުރެވުނު ޕްރޮޖެކްޓްތަކުގެ ތެރޭގައި ބ. އަތޮޅު، ށ. އަތޮޅު، ނ. އަތޮޅު، ތ. އަތޮޅު، މ. އަތޮޅު، ލ. އަތޮޅު އަދި އދ. އަތޮޅުގެ ބައެއް ރަށްތައް ހިމެނެއެވެ.
މި ހާމަކުރުމާ ގުޅިގެން، ފެނަކަ ކޯޕަރޭޝަންގެ މާލީ ހާލަތު ދަށްވެފައިވާތީ، އެ ކުންފުނި އެސް.ޓީ.އޯގެ ދަށަށް ބަދަލުކުރުމަށް ސަރުކާރުން ނިންމާފައިވާކަން ފާހަގަކުރެވެއެވެ.
