ޕީއެންސީން ބުނީ މި ތަގުރީރަކީ ދިވެހިރާއްޖޭގެ މުސްތަގުބަލާމެދު ރައީސް ގެންގުޅުއްވާ ތަސައްވުރާއި، ދުނިޔޭގެ މަސްރަހުގައި ހިނގަމުންދާ ބޮޑެތި ކަންކަމާއި މިހާރުން މިހާރަށް ގެންނަންޖެހިފައި ހުރި ނިޒާމީ އިސްލާހުތަކަށް އަލިއަޅުވައިލައްވާފައިވާ ވަރަށް ޝާމިލު ތަގުރީރެއް ކަމަށެވެ.
ރާއްޖޭގެ މިނިވަންކަމަށް 75 އަހަރު ފުރޭ 2040 ވަނަ އަހަރާ ހަމައަށް ދިވެހިރާއްޖެ ތަރައްޤީވެފައިވާ ޤައުމުތަކުގެ ސަފުގައި ހިމެނުމަށް ރައީސް ހުށަހެޅުއްވި ސިޔާސަތުތަކަކީ މިހާރުގެ ޒުވާނުންނާއި އަންނަން އޮތް ޖީލަށް ދެއްވި އުފާވެރި ޚަބަރެއް ކަމަށް ޕީއެންސީން ފާހަގަކޮށްފައިވެއެވެ.
އިގްތިސާދީ ވިލުންތެރިކަން އިތުރުކުރުމަށާއި، އެންމެންގެ ބައިވެރިވުން އޮންނަ އިގްތިޞާދެއް ބިނާކުރުމަށް ރައީސް ހުށަހެޅުއްވި ސިޔާސަތުތަކުން ރައްޔިތުންގެ އިތުބާރު އިތުރުވި ކަމަށްވެސް އެ ޕާޓީން ބުނެފައިވެއެވެ.
ޕީއެންސީން އިތުރަށް ބުނެފައިވަނީ ރައީސްގެ ތަގުރީރަކީ ދިވެހިރާއްޖެއަކީ ކުޑަ ޤައުމަކަށްވީ ނަމަވެސް ބައިނަލްއަގްވާމީ މަސްރަހުގައި ހަމައިސްކޮޅަށް ދެމިލައި، ހައްގު ބަސްބުނެ ރާއްޖޭގެ އުންމީދުތަކާއި ހުވަފެންތައް އެހެނިހެން ދައުލަތްތަކުގެ ކުރިމަތީ ހާމަކުރަން ކެރޭ، އެކަންކަމަށް ގަދައަޅައި މަސައްކަތްކުރާ ދައުލަތެއްކަން ސާބިތުކޮށްދިން ތަގުރީރެއް ކަމަށެވެ.
ޕާޓީގެ ލީޑަރޝިޕާއި އާންމު މެންބަރުން ރައީސްގެ ތަގުރީރާމެދު ފަޚުރުވެރިވާ ކަމަށާއި، ދިވެހިންގެ މަސްލަހަތުތަކާއި އިހުސާސްތައް ބައިނަލްއަގްވާމީ މަސްރަހުގެ އެންމެ އުސް ފަންތީގައި ތަމްސީލު ކުރެއްވީތީ ޕާޓީން ރައީސަށް ޝުކުރު ދަންނަވާފައިވާ ކަމަށް ޕީއެންސީން ބުނެފައިވެއެވެ.
