ކައުންސިލުން ހާމަކުރި ގޮތުގައި، ގަވާއިދާ ހިލާފަށް މަގު ބަންދުކުރުމުގެ ސަބަބުން ހިނގާ މީހުންނާއި ދުއްވާ އެއްޗެހިތަކަށް ދަތިތަކާ ކުރިމަތިވަމުންދެއެވެ. މީގެ އިތުރުން، މަގުމަތި އަދި ޕޭވްމަންޓްތައް ހަފްލާތަކާއި އިޖުތިމާޢީ އަދި އުމްރާނީ މަސައްކަތްތަކަށް ބޭނުންކުރަމުންދާކަމުގެ ޝަކުވާވެސް ލިބެމުންދާކަމަށް ކައުންސިލުން ފާހަގަކޮށްފައިވެއެވެ.
މި މައްސަލައާ ގުޅިގެން، އައްޑޫ ސިޓީ ކައުންސިލުން ވަނީ "ވަގުތީ ގޮތުން މަގު ބަންދު ކުރުމާ ބެހޭ ގަވާއިދު" އެކުލަވާލައި ގެޒެޓްގައި ޝާއިޢުކޮށްފައެވެ. މި ގަވާއިދަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން، ލޯކަލް ގަވަރމަންޓް އޮތޯރިޓީގެ މަޝްވަރާއާއެކު އެކުލަވާލެވިފައިވާ ގަވާއިދެކެވެ.
ކައުންސިލުން ރައްޔިތުންނަށް އިލްތިމާސްކޮށްފައިވަނީ މި ގަވާއިދުތަކަކީ އާންމު މަސްލަހަތަށް ޓަކައި ހެދިފައިވާ ގަވާއިދުތަކެއް ކަމަށްވާތީ، އެއަށް ހުރުމަތްތެރިކޮށް ހިތުމަކީ ކޮންމެ ރައްޔިތެއްގެ ފަރުދީ ޒިންމާއެއް ކަމުގައެވެ.
އެހެންކަމުން، މަގު ބަންދުކުރުމުގެ ކުރިން އަވަށު އޮފީހުން ނަގަންޖެހޭ ހުއްދަ ނެގުމަށްފަހު ނޫނީ މަގުމަތީގައި އެއްވެސް މަސައްކަތެއް ނުވަތަ ހަރަކާތެއް ނުހިންގުމަށް ކައުންސިލުން ވަނީ އާންމުންނަށް އަންގާފައެވެ.
