މިގޮތުން އަލްޖަޒީރާއިން ރިޕޯޓުކޮށްފައިވާ ގޮތުގައި، ރައީސް މުއިއްޒު ވިދާޅުވެފައިވަނީ އިސްރާއީލުން ޣައްޒާގައި ހިންގަމުންދަނީ "ނަސްލު ފޮހެލުމުގެ" އަމަލުތަކެއް ކަމަށާއި، މިއީ ބައިނަލްއަޤްވާމީ ޤާނޫނުތަކާ ހިލާފު ކަމެއް ކަމަށެވެ.
އަދި އިސްރާއީލުން ލުބުނާނުގައި ހިންގަމުންދާ ޙަމަލާތަކުގެ ސަބަބުން މިހާތަނަށް 569 މީހުން މަރުވެފައިވާކަންވެސް ފާހަގަކުރައްވާފައިވެއެވެ.
މީގެ އިތުރުން، އިސްރާއީލުން ފަލަސްތީނާއި ލުބުނާނުގެ ނޫސްވެރިންނަށް އަމާޒުކޮށް ހަމަލާދެމުންދާކަމަށާއި، އަލްޖަޒީރާގެ އޮފީސްތައް ބަންދުކޮށްފައިވާކަން ފާހަގަކުރައްވައި، މިއީ އިސްރާއީލުން ހިންގަމުންދާ ޖަރީމާތައް ފޮރުވުމަށް ކުރަމުންދާ މަސައްކަތްތަކެއް ކަމަށް ރައީސް މުއިއްޒު ވިދާޅުވެފައިވެއެވެ.
ރައީސް މުއިއްޒުގެ މި ވާހަކަފުޅުތަކަކީ ފަލަސްތީނުގެ ދިފާއުގައި ދިވެހިރާއްޖެއިން ދައްކަމުންދާ ސާބިތުކަމުގެ ހެއްކެއް ކަމަށް ރިޕޯޓުތައް ބުނެއެވެ.
މި ވާހަކަފުޅުތަކުގެ އިތުރުން ބައިނަލްއަގުވާމީ މަޝްރަހުގައި ތިމާވެށީގެ މައްސަލަތަކުގައި ދިވެހިރާއްޖެ ކުރަމުން އަންނަ މަސައްކަތްތަކަށްވެސް ދުނިޔޭގެ އެކި ކަންކޮޅުތަކުން އަންނަނީ ތައުރީފުކުރަމުންނެވެ.
