ބޮލީވުޑް ތަރި ޕަރިނީތީ ޗޯޕްރާ އާއި އޭނާގެ ފިރިމީހާ، އާމް އާދްމީ ޕާޓީގެ ލީޑަރު ރާގަވް ޗަދާ ވަނީ އެ ދެމީހުންގެ ކައިވެނީގެ ފުރަތަމަ އަހަރީ ދުވަސް ރާއްޖޭގައި ފާހަގަކޮށްފިއެވެ.
Advertisement
މި މުނާސަބަތުގައި އެ ދެމީހުން ވަނީ އިންސްޓަގްރާމްގައި ހާއްސަ ފޮޓޯތަކާއި ވީޑިއޯތަކެއް ޝެއާކޮށްފައެވެ.
ޕަރިނީތީ ޝެއާކުރި ފޮޓޯތަކުގެ ތެރޭގައި އޭނާއާއި ރާގަވް ގޮނޑުދޮށުގައި އިށީނދެ އިރުއޮއްސުން ބަލަން ތިބި މަންޒަރާއި، ދެމަފިރިން އަތުގައި ހިފައިގެން ގޮނޑުދޮށުގައި ހިނގާލަން އުޅޭ މަންޒަރު ހިމެނެއެވެ. މީގެ އިތުރުން ރާގަވް ވަނީ ރާއްޖޭގައި ސައިކަލު ދުއްވަމުންދާ ވީޑިއޯއެއްވެސް ޝެއާކޮށްފައެވެ.
ޕަރިނީތީ އޭނާގެ ޕޯސްޓުގައި ލިޔުއްވާފައިވަނީ، "ރާގަވް - އަހަރެންނަށް ކަލާ ލިބުމަކީ ވަރަށް ބޮޑު ނަސީބެއް. އަހަރެން ކައިވެނިކޮށްފައި މިވަނީ އެންމެ ފުރިހަމަ ފިރިހެނާއާ. އަހަރެން ކަލާ ދެކެ ވަރސް ބޮޑަށް ލޯބިވޭ. އަހަރެމެން ކުރިން ބައްދަލުނުވީ ކީއްވެބާ؟ ހެޕީ އެނިވާސަރީ."
ރާގަވްވެސް ވަނީ އޭނާގެ އަނބިމީހާއަށް ލޯބީގެ މެސެޖެއް ފޮނުވާފައެވެ. އޭނާ ލިޔުއްވާފައިވަނީ، "އަހަރެއް ވެއްޖެތަ؟ ހީވަނީ އިއްޔެ ހެން އަހަރެމެން ކައިވެނިކުރީ. އަހަރެމެން ކުރިން ބައްދަލުނުވީ ކީއްވެބާ؟ ކަމަނާ ވަނީ ކޮންމެ ދުވަހެއް ވެސް ޚާއްސަކޮށްދެއްވާފަ... ހެޕީ ފަސްޓް އެނިވާސަރީ، މައި ލަވް!" މިހެނެވެ.
މި ދެ ތަރިން ކައިވެނިކުރީ މިދިޔަ އަހަރުގެ ސެޕްޓެމްބަރު މަހުގައެވެ. އެ ދެމީހުންގެ ކައިވެނީގެ ފުރަތަމަ އަހަރީ ދުވަސް ފާހަގަކުރުމަށް ރާއްޖެ އައުމުން، ގިނަ ބަޔަކު ވަނީ އުފާ ފާޅުކޮށް، ހެޔޮ އެދުންތައް ދެ ތަރިންނަށް ފޮނުވާފައެވެ.
