ދެބުރިއަށް ހެދި މި މިސްކިތް ތިރީބައި ނިންމާ މިމަހުގެ ހަވަނ ދުވަހުން ފެށިގެން އައީ ބޭނުންކުރަމުންނެވެ.
މިސްކިތް ނިންމާ މާދަމާގެ ހުކުރު ނަމާދަށް އެއްކޮށް ހުުވާލުމުގެ މަސައްކަތް މާލޭ ސިޓީ ކައުންސިލުން އަންނަނީ ކުރަމުންނެވެ. ދެ ބުރިއަށް އިމާރާތްކޮށްފައިވާ މިސްކިތުގެ މަސައްކަތް ނިމޭއިރު 3،200 އަކަފޫޓު މިސްކިތަށް ވަނީ އިތުރުކޮށްފައެވެ.
މި މިސްކިތުގެ މަތީބައިގައި އަންހެނުންނަށް ނަމާދުކުރުމަށް ބައެއް ވަނީ ހާއްސަކޮށްފައެވެ. މީގެއިތުރުން ޖަނާޒާގައި އަންނަ މީހުން މަޑުކުރާނެ ވެއިޓިން ބަޔަކާ ޖަނާޒާތަކަށް އަންނަ ވީއައިޕީން މަޑުުކޮށްލަން ވީއައިޕީ ބައެއްވެސް ވަނީ ހަދާފައެވެ.
އާ ސަހަރާ މިސްކިތުގައި އަންހެނުން ނަމާދުކުރަން ހެދި ބައި، ފޮޓޯ: ސީއެންއެމް
މިސްކިތް އެއްކޮށް ހުޅުވުމުން ޖަނާޒާގެ ކަންކަން ވެސް އާ ސަހަރާގައި ކުރިޔެކޭ އެއްގޮތަށް ބާއްވަމުން ގެންދާނެކަމަށް މާލޭ މޭޔަރު އާދަމް އާޒިމްވަނީ ކުރުން ވިދާޅުވެފައެވެ.
އާ ސަހަރާ މިސްކިތައް އަލަށް އިތުރުކުރި ބައި ކުރީ މިސްކިތާ ގުޅާލާފައި. މިސްކިތް މި ނިމުނީ ގާތްގަޑަކަށް ދޮޅު އަހަރެއްހާ ދުވަސް ފަހުން. ފޮޓޯ: ސީއެންއެމް
މާލޭ ސިޓީ ކައުންސިލްގެ މޭޔަރުކަމުގައި މިހާރުގެ ރައީސް ޑރ. މުހައްމަދު މުއިއްޒު ހުންނެވި ދުވަސްވަރު މިދިޔަ އަަހަރުގެ މޭމަހުގެ މަރާމާތުކުރަން ފެށި މިސްކިތުގެ މަސައްކަތް މި ނިމުނީ ތިން ކޮންޓްރެކްޓަރުން އެ މަޝްރޫއުއާ ހަވާލުވުމަށް ފަހުއެވެ.
މި މަސައްކަތް ހަވާލުކުރި ފުރަތަމަ ކޮންޓްރެކްޓަރު މަސައްކަތް ނުނިންމިގެން އެހެން ބަޔަކާއި ހަވާލުކުރިއިރު އެ ކުންފުންނަށް ވަނީ 4 މިލިއަަނަށް ވުރެ ގިނަ ރުފިޔާ ދޫވެސްކޮށްފެއެވެ.
އާސަހަރާގެ މަސައްކަތަކީ ސިޓީ ކައުންސިލްގެ ޖަލްސާއަކުން ފާސްކޮށްގެން، ކުރިއަށް ގެންދިޔަ މަޝްރޫއެކެވެ. މަޝްރޫއަށް ކަނޑައެޅި ބަޖެޓަކީ 4.9 މިލިއަން ރުފިޔާއެވެ. އެހެންނަނަމަވެސް އާސަހަރާގެ ކަންކަން ނިންމުމަށް 9.7 މިލިއަން ރުފިޔާ ހޭދަވާނެކަމަށް މޭޔަރު އާޒިމް ވަނީ ވިދާޅުވެފައެވެ.
