ގައުމީ މޫސުމާ ބެހޭ އިދާރާ (މެޓް) އިން މިއަދު އާންމުކުރި މޫސުމީ ލަފާގައި ވިދާޅުވެފައިވަނީ މެދުރާއްޖޭގެ ތެރޭގެ އެކި ހިސާބުތަކަށް ވިއްސާރަކޮށް ގުގުރުން އެކަށީގެންވާ ކަމަށެވެ. އަދި ދެކުނާއި އުތުރުގެ ބައެއް ރަށްތަކަށް ކެރީގެ އަސަރުކޮށް ގުގުރުން އެކަށީގެންވާ ކަމަށް ވެސް ވަނީ ފާހަގަކޮށްފައެވެ.
މެޓްގެ ލަފާގައި ވިދާޅުވެފައިވާ ގޮތުގައި ހުޅަނގާއި ހުޅަނގު އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައި ގަދަވުން އެކަށީގެންވެއެވެ.
ކަނޑުތައް އާދައިގެ ވަރަކަށް ގަދަވެފައި، ވިލާގަނޑުގައި ގަދަވާނެ ކަމަށް ވެސް މެޓް އިން ލަފާކޮށްފައިވެއެވެ. ރާޅުގެ އުސްމިން 3-5 ފޫޓް ހުންނާނެ ކަމަށް ވެސް ވަނީ ބަޔާންކޮށްފައެވެ.
މެޓް އިން އިއްޔެ ބުނީ ހުކުރު ދުވަހުން ފަށައިގެން ފެށިގެން މޫސުން އަލިވާން ފަށާނެ ކަމަށާއި، ވިއްސާރަ ކެރިއަށް ބަދަލުވާނެ ކަމަށެވެ.
މި މޫސުމީ ހާލަތާ ގުޅިގެން ކަނޑުދަތުރުފަތުރު ކުރާއިރު ސަމާލުވުމަށް އާންމުންނަށް އިލްތިމާސްކޮށްފައިވެއެވެ.
