ޕީއެސްއެމް އިން މި މައްސަލަ ހުށަހެޅީ ފުލުހަށެވެ. ނަމަވެސް ފުލުހުން މި މައްސަލަ އޭސީސީއަށް ފޮނުވި ސަބަބަކީ ކޮރަޕްޝަންގެ މައްސަލަތައް ތަހުގީގުކުރުމުގެ އިހުތިސާސް އޮންނަނީ އޭސީސީގައި ކަމަށް ވާތީކަމަށް މިއަދު ސީއެންއެމްއާއި ވާހަކަ ދެއްކި ޕީއެސްއެމްގެ އޮފިޝަލެއް ބުންޏެވެ.
އޮޑިޓް ރިޕޯޓުން ދައްކާ ގޮތުގައި މި ހިޔާނާތުގެ ސަބަބުން ޕީއެސްއެމްގެ މާލިއްޔަތުން 9 މިލިއަނަށްވުރެ ގިނަ ރުފިޔާ ގެއްލިފައިވެއެވެ. މީގެ ތެރޭގައި ތިޖޫރީގައި ހުރި 4.26 މިލިއަން ރުފިޔާ އާއި 2017 އިން 2020 އަށް އާމްދަނީގެ ގޮތުގައި ލިބުނު 4.23 މިލިއަން ރުފިޔާ ހިމެނެއެވެ.
އަދި ޑޮލަރު ގަތުމަށް ނެގި ފައިސާގެ ތެރެއިން 297,257 ޑޮލަރަށްވާ 4.58 މިލިއަން ރުފިޔާ ޕީއެސްއެމަށް ލިބިފައެއް ނުވެއެވެ. މީގެ އިތުރުން، ޕީއެސްއެމްގެ ކުރީގެ ފައިނޭންސް ޑިރެކްޓަރުގެ ދަރިއެއްގެ އެކައުންޓަށް 1 މިލިއަން ރުފިޔާއަށްވުރެ ގިނަ ފައިސާ ޖަމާކޮށްފައިވާ ކަމަށް އޮޑިޓް ރިޕޯޓުން ދައްކައެވެ.
މި މައްސަލައިގައި ޕީއެސްއެމްގެ ކުރީގެ ވެރިން ހިންގާފައިވާ އިތުރު ހިޔާނާތުގެ ޢަމަލުތަކެއް ހުރިކަންވެސް އޮޑިޓް ރިޕޯޓުން ވަނީ ފާހަގަކޮށްފައެވެ.
