މާލޭގައި ސައިކަލެއްގެ މަޑިދަށުން މި މަހު 14 ވަނަ ދުވަހު ވަގަށް ނެގި ކަމަށްވަނީ 442،750 ރުފިޔާއެވެ. އެ މައްސަލާގައި ބަންގްލަދޭޝް މީހެއް ކަމަށްވާ ޖަހަންގިރް އާލަމްވަނީ ހައްޔަރުކޮށްފަ އެވެ.
އޭނާގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓަށް ހާޒިރު ކުރުމުން ފުލުހުން ވަނީ އޭނާ އެ ކުށްކުރި ކަމަށް ތުހުމަތު ކުރެވޭ ހެކިތަކެއް ހުށަހަޅައިފަ އެވެ.
އޭގެ ތެރޭގައި ހިމެނޭ ސީސީޓީވީ ވީޑިއޯ އިން އޭނާ ސައިކަލެއްގެ މަޑިދަށް ހިއްލައިގެން އެއްޗެއް ނަގާތަން ފެންނަ ކަމަށް ކޯޓު އަމުރުގައި ބުނެފައިވެ އެވެ.
ނަމަވެސް ޖަހަންގީރު ބުނާގޮތުގައި އެއީ ވިޔަފާރީގެ މައްސަލާގައި އޭނާ ފްރޭމް ކުރީ އެވެ. އަދި ވީޑިއޯ ފުޓޭޖުން ފެންނަނީ އޭނާ މަޑިދަށުން ފައިސާ ނަގާ މަންޒަރު ނޫން ކަމަށް ވެސް އޭނާ ބުނެ އެވެ.
މައުލީމާތު ލިބިފައިވާ ގޮތުގައި އޭނާއަކީ ރާއްޖޭގައި ދެ މީހުންނާ ކައިވެނި ކޮށްގެން ތިން ދަރިން ލިބިފައިވާ އަދި ގަވައިދާ އެއް ގޮތަށް އުޅެމުން އަންނަ ބިދޭސީއެކެވެ. ކްރިމިނަލް ކޯޓުން މިއަދު ވަނީ އޭނާގެ ބަންދަށް ފަސް ދުވަސް އިތުރުކޮށްފަ އެވެ.
