އާސަހަރާ މިސްކިތް މަރާމާތުކުރުމަށް އެ ތަނުގައި ބާއްވަމުން ދިޔަ ޖަނާޒާތައް ހުއްޓާލީ މިދިޔަ އަހަރުގެ މޭމަހުގެ ތެރޭގައެވެ. އޭގެ ފަހުން ޖަނާޒާތައް ބާއްވަމުން އަންނަނީ ހުޅުމާލޭ ސަހަރާގައެވެ.
އާސަހަރާ މިސްކިތް އެއްކޮށް ނިންމާ އަނަން ހުކުރުދުވަހު އެއްކޮށް ހުޅުވާލަން ސިޓީ ކައުންސިލުން ވަނީ ނިންމާފައެވެ. އެއާއި އެކު އެތަނުގައި އަލުން ޖަނާޒާތައް ބާއްވަމުން ގެންދާނެކަމަށް އެ ކައުންސިލުން ބުނެއެވެ.
ދެބުރިއަށް ހެދި މި މިސްކިތް ތިރީބައި ނިންމާ މިމަހުގެ ހަވަނަ ދުވަހުން ފެށިގެން އައީ ބޭނުންކުރަމުންނެވެ. މިސްކިތުގެ މަސައްކަތް ނިމޭއިރު 3،200 އަކަފޫޓު މިސްކިތަށް ވަނީ އިތުރުކޮށްފައެވެ.
އާ ސަހަރާ މިސްކިތުގައި އަންހެނުން ނަމާދުކުރަން ހެދި ބައި، ފޮޓޯ: ސީއެންއެމް
މި މިސްކިތުގެ މަތީބައިގައި އަންހެނުންނަށް ނަމާދުކުރުމަށް ބައެއް ވަނީ ހާއްސަކޮށްފައެވެ. މީގެއިތުރުން ޖަނާޒާގައި އަންނަ މީހުން މަޑުކުރާނެ ވެއިޓިން ބަޔަކާ ޖަނާޒާތަކަށް އަންނަ ވީއައިޕީން މަޑުުކޮށްލަން ވީއައިޕީ ބައެއްވެސް ވަނީ ހަދާފައެވެ.
މާލޭ ސިޓީ ކައުންސިލްގެ މޭޔަރުކަމުގައި މިހާރުގެ ރައީސް ޑރ. މުހައްމަދު މުއިއްޒު ހުންނެވި ދުވަސްވަރު މިދިޔަ އަަހަރުގެ މޭމަހުގެ މަރާމާތުކުރަން ފެށި މިސްކިތުގެ މަސައްކަތް މި ނިމުނީ ތިން ކޮންޓްރެކްޓަރުން އެ މަޝްރޫއުއާ ހަވާލުވުމަށް ފަހުއެވެ.
އާ ސަހަރާ މިސްކިތައް އަލަށް އިތުރުކުރި ބައި ކުރީ މިސްކިތާ ގުޅާލާފައި. މިސްކިތް މި ނިމުނީ ގާތްގަޑަކަށް ދޮޅު އަހަރެއްހާ ދުވަސް ފަހުން. ފޮޓޯ: ސީއެންއެމް
މި މަސައްކަތް ހަވާލުކުރި ފުރަތަމަ ކޮންޓްރެކްޓަރު މަސައްކަތް ނުނިންމިގެން އެހެން ބަޔަކާއި ހަވާލުކުރިއިރު އެ ކުންފުންނަށް ވަނީ 4 މިލިއަަނަށް ވުރެ ގިނަ ރުފިޔާ ދޫވެސްކޮށްފެއެވެ.
އާސަހަރާގެ މަސައްކަތަކީ ސިޓީ ކައުންސިލްގެ ޖަލްސާއަކުން ފާސްކޮށްގެން، ކުރިއަށް ގެންދިޔަ މަޝްރޫއެކެވެ. މަޝްރޫއަށް ކަނޑައެޅި ބަޖެޓަކީ 4.9 މިލިއަން ރުފިޔާއެވެ. އެހެންނަނަމަވެސް އާސަހަރާގެ ކަންކަން ނިންމުމަށް 9.7 މިލިއަން ރުފިޔާ ހޭދަވާނެކަމަށް މޭޔަރު އާޒިމް ވަނީ ވިދާޅުވެފައެވެ.
