އެމްއެންޑީއެފްއިން މައުލޫމާތުދޭގޮތުގައި އަލިފާން ރޯވެފައިވަނީ ކަނޑިންމަ ރިސޯޓަށް ފެން ހިފައިގެން ދަތުރުކުރަމުން ދިޔަ "ހަމްދު" ނަމަކަށް ކިޔާ މުދާ އުފުލާ ދޯންޏެއްގައި ކަަމަށެވެ.
އެ ދޯނީގެ އިންޖީނު ރޫމުގައި އަލިފާނުގެ ހާދިސާއެއް ހިނގައިގެން އުޅޭކަމުގެ މައުލޫމާތު އެމްއެންޑީއެފް ސެންޓްރަލް އޭރިއާ ކޮމާންޑް، ދ.ކުޑަހުވަދޫ ފަޔާ ސްޓޭޝަނަށް ލިބިފައިވަނީ މިއަދު ހެނދުނު 7:20 ހާއިރު ކަމަށާއި އެ އިރުއްސުރެ ފަޔާ ސްޓޭޝަނުގެ ފަޔާ ފައިޓަރުން ހަރަކާތްތެރިވަމުން ދާކަމަށް އެމްއެންޑީއެފް އިން ބުނެއެވެ.
ފަޔާ ފައީޓަރުންނަށް އެހީތެރިވުމުގެ ގޮތުން އެމްއެންޑީއެފް ސެންޓްރަލް އޭރިއާ ކޮމާންޑް، ފ.ނިލަންދޫ ފަޔާ ސްޓޭޝަންގެ ފަޔާ ފައިޓަރުން ވެސް މިއަދު 11:00 ހާއިރުން ފެށިގެން އެ ސަރަހައްދުގައި ހަރަކާތްތެރިވަމުން ދާކަމަށް އެމްއެންޑީއެފް އިން ބުނެއެވެ.
"ހަމްދު" ދޯނީގައި ރޯވެފައިވާ އަލިފާންގެ 80 ޕަސެންޓް މިހާރު ވަނީ ކޮންޓްރޯލް ކުރެވިފައި ވާކަމަށް ފާހަގަކޮށް އެމްއެންޑީއެފް އިން ބުނީ އެ ދޯނިން ދަތުރުކުރަމުން ދިޔައީ 4 މީހުން ކަމަށެވެ. އަދި އެ އެންމެންގެ ހާލު ރަނގަޅު ނަަމވެސް ދޯނި ވަނީ ވަރަށް ބޮޑަށް އަނދާފައިކަމަށް އެމްއެންޑީއެފްއިން ބުނެއެވެ.
