ފުލުހުންނާއި އިމިގްރޭޝަން ހިމެނޭ ގޮތަށް އިއްޔެ ހުޅުމާލޭގައި ކުރިޔަށް ގެންދިޔަ އޮޕަރޭޝަންގައި 200 އޮފިސަރުން ބައިވެރިވެ 27 ސަރަހައްދެއް ބަލާ ފާސްކޮށްފައިވާކަމަަށް އިމިގްރޭޝަނުން ބުނެއެވެ.
އިމިގްރޭޝަނުން ބުނީ އިއްޔެ އޮޕަރޭޝަންގައި 314 ތަނެއް ބަލާ ފާސްކޮށް 769 ބިދޭސީންނާއި ސުވާލުކޮށްފައިވާކަމަށެވެ. އަދި ގަވައިދާ ހިލާފަށް އުޅުނު 28 ބިދޭސީއަކު ބަންދުކޮށްފައިވާކަމަށާއި އޭގެތެރޭގައި ފިލައިގެން އުޅުނު މީހުން ހިމެނޭކަމަށްވެސް އިމިގްރޭޝަނުން ބުނެއެވެ.
މީގެއިތުރުން ވިސާ ފުރިހަމަ ނޫން 165 ބިދޭސީއަކު އިމިގްރޭޝަނަށް ހާޒިރުވުމަށް ނޯޓިސް ދީފައިވާކަމަށްވެސް އެ އިދާރާއިން ބުނެއެވެ. އަދި ގަވައިދާ ހިލާފަށް ބިދޭސީން ލައްވާ މަސައްކަތް ކުރުވި 92 ދިވެއްސަކަށް ލިޔުމުން ނަސޭހަތް ދިންކަމަށްވެސް އިމިގްރޭޝަނުން ބުނެއެވެ.
ދިން ނޯޓިސްއާ އެއްގޮތަށް އަމަލުނުކުރާ ފަރާތްތަކާއި މެދު ފިޔަވަޅު އަޅާނެކަމުގެ އިންޒާރު ދީފައިވާކަމަށްވެސް އިމިގްރޭޝަނުން ބުނެއެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރާ މަސައްކަތުގެ ދަށުނަ މިދިޔަ 10 މަހުގެ ތެރޭ 4000ވުރެ ގިނަ ބިދޭސީން ޑީޕޯޓްކޮށްފައިވާކަމަށް އިމިގްރޭޝަނުން ވަނީ ބުނެފައެވެ.
