ކަސްޓަމަރުންގެ އެކައުންޓުން ވަގަން ފައިސާ ނެގިކަން ސާބިތުވެ ހުކުމް ކުރީ ބ. އޭދަފުށި، ހިޔާވަހި، އަލީ މާޒިންގެ މައްޗަށެވެ. މީނާއަކީ ބޭންކުގައި 9 އަހަރު ވަންދެން މަސައްކަތް ކޮށްފައިވާ މީހެކެވެ.
އޭނާގެ މައްޗަށް އުފުލި ހިޔާނާތްތެރިވުމުގެ ކުށުގެ ދައުވާގައިވަނީ ބީއެމްއެލްގެ ކަސްޓަމާ ސާވިސް އެސިސްޓެންޓެއްގެ ގޮތުގައި ހުރެ، ލިބިފައިވާ މައުލޫމާތާއި ބާރުގެ ބޭނުންކޮށްގެން މެއި 14، 2021 އިން ސެޕްޓެމްބަރު 23، 2021 ގެ ނިޔަލަށް އެކި ދުވަސް މަތިން ކަސްޓަމަރުންގެ އެކައުންޓުން ފައިސާ ނަގާފައިވާކަމަށެވެ.
ހުކުމުގައި ވަނީ 13 ކަސްޓަމަރެއްގެ މައުލޫމާތު ބީއެމްއެލްގެ ސީއާރްއެމް ސިސްޓަމްއިން ބަދަލުކޮށް، ކަސްޓަމަރުންގެ ހުއްދަ ނެތި އެ ކަސްޓަމަރުންގެ އިންޓަނެޓް ބޭންކިން މީނާ ރަޖިސްޓްރީކޮށްފައިވާ ކަމަށެވެ.
ސައްހަ ނޫން ކްރެޑިޓް ކާޑް ޕޭމަންޓްތަކާއި ފޮރެކްސް ޓްރޭޑިން މުއާމަލާތްތަކާ އެކު މީނާގެ އަމިއްލަ އެކައުންޓަށް ޖަމާކޮށްގެން ޖުމްލަ 482،611.41ރ. ވަގަން ނަގާފައިވާކަމަށް ހުކުމްގައި އެވެ.
އެ މައްސަލާގައި އޭނާ އިއުތިރާފުވެފައިވާތީ މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއް ގޮތުގައެވެ.
ކުށަށް އިއުތިރާފުވުމުން ޕީޖީއާއެކު އޭނާއާ އެކު ހަދާފައިވާ އެއްބަސްވުމުގެ ބުނެފައިވަނީ އެ ކުށަކީ 4 ވަނަ ދަރަޖައިގެ ކުށެއް ކަމަށެވެ. އަދި އެ ކުށުގެ އަދަބަކީ އެއް އަހަރާއި 7 މަހާއި 6 ދުވަހަށް ޖަލަށްލުން ކަމަށެވެ. އެހެންނަމަވެސް އެއްބަސްވުމާއެކު އަދަބު 9 މަހާއި 18 ދުވަހަށް ބަދަލު އަންނާނެ ކަމަށް އެއްބަސްވުމުގައިވެއެވެ.
މީގެ އިތުރުން ޖަލު އަދަބު، 40 ގަޑިއިރު މުޖުތަމައުއަށް ހިދުމަތްކުރުމާއި 56،200 ރުފިޔާއިން ޖޫރިމަނާކުރުމުގެ އަދަބަކަށް ބަދަލުކުރެވޭ ގޮތަށް ޕީޖީއާއެކު އެއްބަސްވެފައިވެ އެވެ. އަދި ބީއެމްއެލްއާއެކު މާޒިން ހަދާފައިވާ އެއްބަސްވުމުގައިވާ ގޮތަށް ގެއްލުމުގެ ބަދަލުގެ ފައިސާ ދައްކަމުން ގެންދިއުމަށް ވެސް ޕީޖީގެ އެއްބަސްވުމުގައިވެއެވެ.
ޖޫރިމަނާގެ ފައިސާ ތިން މަސް ދުވަހުގެ ތެރޭގައި ދައްކާ ހަލާސްކުރުމަށްވެސް ހުކުގައިވެއެވެ.
.
