ރައީސް ޔާމީން ވެރިކަމުގައި އެޅި ސަލްމާން މިސްކިތް ބޭނުންކުރަން ފެށީ 2022 ވަނަ އަހަރު ރޯދަމަހުއެވެ. ގާތްގަޑަކަށް 370 މިލިއަން ރުފިޔާ ހަރަދުކޮށްގެން އިމާރާތްކުރި މިސްކިތް ހުޅުވި ފަހުން ތަނާއި އެތަނުގެ ގިނަ މައްސަލަތަކެއް ފާހަގަކޮށް ތާފުުތު ޝަކުވާތައް ވަނީ ބޮޑުވެފައެވެ.
އެންމެ ބޮޑު އެއް މައްސަލައަކީ ތަނުގެ އޭސީތައް އަބަދުވެސް މައްސަލަ ޖެހި ތަން ހޫނުވުމުގެ މައްސަލައެވެ. އަދި ތަނުގެ ސަައުންޑް ސިސްޓަމްގެ މައްސަލަތައްވެސް ވަނީ ފެންމަތިވެފައެވެ.
ސަލްމާން މިސްކިތުގައި ހުރި އޭސީތަކަށް ދިމާވި މައްސަލަ ހައްލު ކުރުމަށް، ރާއްޖެއިން ބޭރުން އެކަމާއި ގުޅުންހުރި މާހިރުން ގެނެސްގެން އިސްލާމިކް މިނިސްޓްރީން މިދިޔަ އަހަރު ކުރީކޮޅުވެސް މަސައްކަތް ކުރިއެވެ. އެހެންނަމަވެސް އެކަން މުޅިން ހައްލުނުވެ މިސްކިތުގައި ފިނިކިރުމަށް ފަންކާ ބަހައްޓާ އަންނަނީ ބޭނުންކުރަމުންނެވެ.
އިސްލާމިކް މިނިސްޓްރީން ބުނީ ސަލްމާން މިސްކިތުގެ އޭސީ ސިސްޓަމް މަރާމާތު ކުރުމުގެ މަސައްކަތް މިއަދު ފަށާފައިވާކަމަށެވެ.
ސަލްމާން މިސްކިތުގެ ބައެއް ބައިތައް މަރާމާތު ކުރާނެ ބަޔަކު ހޯދުމުގެ މަސައްކަތް އިސްލާމީ ކަންތައްތަކާއި ބެހޭ ވުޒާރާއިން މިއަހަރު ކުރީކޮޅު ވަނީ ކޮށްފައެވެ.
