މަފުށީ ޖަލަށް ޑްރަގާއި ފޯނާއި ވެއްދި ކަރެކްޝަނަލް ސާވިސްގެ ފަސް ޖަލު އޮފިސަރަކަށް ދައުލަތުންވަނީ ދައުވާކޮށްފައެވެ.
ދައުވާކުރަން ފޮނުވި މީހުން
- ރ. އުނގޫފާރު، އައިވަރީހައުސް/ ޖިނާހް އަބްދުއްރަހީމް
- ކ. މާފުށި، ބީޗްހައުސް / އަލީ ހިޝާމް
- ހދ. ނޭކުރެންދޫ، ތަރާނާގެ / އަލީ ނާޒިމް
- ގއ. ވިލިނގިލި، ކުއްޅަވައްގެ / މުހައްމަދު ފަތޫހު ފަތުހުﷲ
- ނ. ލަންދޫ، ކާމިނީގެ/ އަލީ އަސްފާގު
މީގެތެރެއިން އަލީ ނާޒިމާއި މުހައްމަދު ފަތޫހު ފަތުހުﷲ އާއި އަލީ އަސްފާގު ދައުލަތާއި އެކު އިއުތިރާފުގެ އެއްބަސްވުން ހަދާދައިވާކަމަށް ޕީޖީ އޮފީހުން ވަނީ ބުނެފައެވެ. މި މައްސަލަގެ ޝަރީއަތް މިއަދު ފަށާ މި މީހުންނަށް ދައުވާ ވަނީ އިއްވާފައެވެ. އެހެންނަމަވެސް ލިޔެކިޔުންތައް ހަމަ ނުވާތީ އެމީހުން ޖަވާބުދާރީވެފައެއް ނުވެއެވެ.
މި މައްސަލާގައި ދެން ހިމެނޭ ޖިނާހް އަބްދުއްރަހީމާއި އަލީ ހިޝާމްގެ މައްޗަށް މިއަދުގެ އަޑުއެހުމުގައި ދައުވާ އުފުލާފައެއް ނުވެއެވެ.
ޖަލުގައި ތިބޭ ކުށްވެރިންނަށް މަސްތުވާތަކެއްޗާއި ފޯނު ފަދަ ތަކެތި، ރިޝްވަތު ނައިގެން ފޯރުކޮށް ދެމުން ދިޔަ މައްސަލައިގައި ހައްޔަރުކުރި މޯލްޑިވްސް ކަރެކްޝަނަލް ސާވިސަސްގެ 13 އޮފިސަރުންގެ ތެރެއިން 11 އޮފިސަރަކު ޝަރީއަތް ނިމެންދަން ބަންދު ކުރަން ކޯޓުން ވަނީ އަމުރުކޮށްފައެވެ.
މި ހުރިހާ އޮފިސަރުން ހައްޔަރުކުރުމަށްފަހު، އެ މީހުން ދިރިއުޅެމުންދިޔަ ތަންތަން ފުލުހުން ވަނީ ބަލާ ފާސްކޮށްފައެވެ.
މި އޮފިސަރުންގެ އެކައުންޓަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާ ކަމަށާއި އެއް އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވާއިރު، އެ ފައިސާ ޖަމާކޮށްފައި ވަނީ ކުދި އަދަދުތަކުންކަމަށް ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ.
