މަފުށީ ޖަލަށް ޑްރަގާއި ފޯނާއި ވެއްދި ކަރެކްޝަނަލް ސާވިސްގެ 13 އޮފިސަރެއްގެ މައްޗަށް ދައުވާކުރަން ފުލުހުން ވަނީ ޕީޖީގައި އެދިފައެވެ. މީގެތެރެއިން ފަސް އޮފިސަރަކަށް ދައުވާކުރަން އެ މައްސަލަ އިއްޔެ ކްރިމިނަލްކޯޓަށް ހުށައަޅާފައިވާކަމަށް ޕީޖީ އޮފީހުން ބުނެއެވެ.
ދައުވާކުރަން ފޮނުވި މީހުން
- ރ. އުނގޫފާރު، އައިވަރީހައުސް/ ޖިނާހް ޢަބްދުއްރަޙީމް
- ކ. މާފުށި، ބީޗްހައުސް / ޢަލީ ހިޝާމް
- ހދ. ނޭކުރެންދޫ، ތަރާނާގެ / އަލީ ނާޒިމް
- ގއ. ވިލިނގިލި، ކުއްޅަވައްގެ / މުހައްމަދު ފަތޫހު ފަތުހުﷲ
- ނ. ލަންދޫ، ކާމިނީގެ/ އަލީ އަސްފާގު
މީގެތެރެއިން ޖިނާހް އަބްދުއްރަޙީމާއި އަލީ ހިޝާމްގެ މައްޗަށް އުފުލާފައުވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި މަނީ ލޯންޑްރިންގެ ކުށުގެ ދައުވާ އާއި ނުޙައްޤު މުއްސަނދިކަން ހޯދައި ލިބިގަތުމުގެ ކުށުގެ ދައުވާއެވެ.
އަދި ބާކީ ތިބި ތިން މީހުންކަމަށްވާ އަލީ ނާޒިމާއި މުހައްމަދު ފަތޫހް ފަތުހުﷲ އާއި އަލީ އަސްފާޤްގެ މައްޗަށް އުފުލާފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި ނުހައްޤު މުއްސަނދިކަން ހޯދައި ލިބިގަތުމުގެ ކުށުގެ ދައުވާއެވެ.
ޕީޖީ އޮފީހުން ބުނީ މި މައްސަލާގެ ތަހުގީގު ނިންމާ ދައުވާކޮށްދިނުމަށް އެދި 13 މީހެއްގެ މައްސަލަ ފޮނުވި ނަމަވެސް ދެން ތުހުމަތުކުރެވޭ އިތުރު މީހުންގެ މައްޗަށް ދައުވާކުރެވޭ މިންވަރަށް މި ވަގުތު ހެއްކާއި ޤާރީނާ ލިބިފައިނުވާކަމަށެވެ. އެހެންކަމުން މިވަގުތަށް އެމީހުންގެ ދައުވާ ނުކުރުމަށް ނިންމާފައި ވާކަމަށްވެސް ޕީޖީ އޮފީހުން ބުނެއެވެ.
މި މައްސަލައިގެ ތަޙުޤީޤު އަދިވެސް ކުރިއަށްދާތީ އިތުރު ބައިތަކުގެ ތަޙުޤީޤު ނިމުމުން ތުހުމަތުކުރެވޭ އިތުރު މީހުންގެ މައްޗަށް ދަޢުވާކުރުމާމެދު ގޮތެއް ނިންމާނެ ކަމަށްވެސް ޕީޖީ އޮފީހުން ވަނީ ބުނެފައެވެ.
ޖަލުގައި ތިބޭ ކުށްވެރިންނަށް މަސްތުވާތަކެއްޗާއި ފޯނު ފަދަ ތަކެތި، ރިޝްވަތު ނައިގެން ފޯރުކޮށް ދެމުން ދިޔަ މައްސަލައިގައި ހައްޔަރުކުރި މޯލްޑިވްސް ކަރެކްޝަނަލް ސާވިސަސްގެ 13 އޮފިސަރުންގެ ތެރެއިން 11 އޮފިސަރަކު ޝަރީއަތް ނިމެންދަން ބަންދު ކުރަން ކޯޓުން ވަނީ އަމުރުކޮށްފައެވެ.
މި ހުރިހާ އޮފިސަރުން ހައްޔަރުކުރުމަށްފަހު، އެ މީހުން ދިރިއުޅެމުންދިޔަ ތަންތަން ފުލުހުން ވަނީ ބަލާ ފާސްކޮށްފައެވެ.
މި އޮފިސަރުންގެ އެކައުންޓަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާ ކަމަށާއި އެއް އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވާއިރު، އެ ފައިސާ ޖަމާކޮށްފައި ވަނީ ކުދި އަދަދުތަކުންކަމަށް ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ.
