އުމުރުން 15 އަހަރުގެ އަންހެންކުއްޖަކާ އެކު ގަދަކަމުން ބަދު އަހުލާގީ އަމަލު ހިންގި ކަމުގެ ތުހުމަތުގައި، ޝަރީއަތް ނިމެންދެން ބަންދުކޮށްފައި ހުރީ އަބްދުލްގަނީ އަމިއްލައަށް ދަންޖެހިގެން މަރުވީ މިދިޔަ މަހުގެ 24 ވަނަދުވަހުއެވެ.
މީނާގެ ޕޯސްޓްމޯޓަމަށް ހެދުމަށް އިންޑިއާއަށް ފޮނުވީ މިދިޔަ މަހުގެ 27ގައެވެ. އޭނާގެ ހަށިގަނޑު މާލެ ގެނެސް ވަޅުލާފައިވަނީ އިއްޔެ ހެނދުނުއެވެ.
މި މީހާ ޕޯސްޓްމޯޓަމް ރިޕޯޓާއި ގުޅޭ ގޮތުން ފުލުހުން އަދި ވަކި އެއްޗެއް ނުބުނެއެވެ.
ޖަލުގައި މަރުވާ މީހުންގެ ޕޯސްޓްމޯޓަމް ހެދުން ސަރުކާރުން ލާޒިމްކުރީ މިދިޔަ ޖޫން މަހުއެވެ. މިގޮތަށް ނިންމީ މާފުށި ޖަލުގައި ބަންދުކޮށްފައި ހުއްޓާ މިދިޔަ ޖޫން މަހު މަރުވި ށ. ފުނަދޫ، ޒަމާނީ ވިލާ، މުހައްމަދު ޖަމީލު މަރުވީ ޖަލުގެ އޮފިސަރުން އަނިޔާކޮށްގެން ކަމަށް ތުހުމަތުކުރުމާ ގުޅިގެންނެވެ.
ހޯމްލޭންޑް މިނިސްޓްރީގެ މިނިސްޓަރު އަލީ އިހުސާން ވިދާޅުވެފައިވަނީ އޭގެ ފަހުން ޖަލުގައި މަރުވާ ކޮންމެ މީހެއްގެ ޕޯސްޓް މޯޓަމް ހަދާނެ ކަމަށެވެ. މި ޕޯސްޓްމޯޓަމްއަކީ އެ ނިންމުމަށްފަހު ހެދި ފުރަތަމަ ޕޯސްޓްމޯޓަމްއެވެ.
