އެ މިނިސްޓްރީން ބުނީ މަރުކަޒު ކައިރީ ގިޑިގެއެއް ހަދަނީ އެ މިސްކިތަށް 40 އަހަރު ފުރުން ފާހަގަކުރާ މުނާސަބަތާއި ގުޅިގެންކަމަށެވެ.
އިސްލާމިކް މިނިސްޓްރީން ވަނީ މި މަސައްކަތް ކޮށްދޭން ބޭނުންވާ ފަރާތަކަށް ޝައުގުވެރިކަން ފާޅުކުރުމަށް ހުޅުވާލާފައެވެ.
މި ބީލަންމަށް ކުރިމަތިލެވޭނީ ވިޔަފާރި ރަޖިސްޓްރީ ކުރުމުގެ ޤާނޫނު ގެ ދަށުން ވިޔަފާރި ރަޖިސްޓްރީ ކޮށްފައިވާ ކުދި އަދި މެދު ފަންތީގެ ވިޔަފާރިތަކަށްކަމަށް މިނިސްޓްރީން ބުނެއެވެ. މިކަމާއި ގުޅިގެން ބާއްވާ ޕްރީ ބިޑް މީޓުން އޮންނާނީ އަންނަ ހޯމަދުވަހުކަމަށް އިސްލާމިކް މިނިސްޓްރީން ބުނެއެވެ. އަދި ބިޑް ހުޅުވުން އޮންނާނީ މިމަހުގެ 13 ވަނަ ދުވަހުކަމަށްވެސް އެ މިނިސްޓްރީން ބުނެއެވެ.
އިސްލާމީ މަރުކަޒށް 40 އަހަރު ފުރުން ފާހަގަކުރާ މުނާސަބަތާއި ގުޅިގެން އެ މިސްކިތު މުންނާރު ކައިރީ މަސްފެންގަޑެއް ހަދަންވެސް މިނިސްޓްރީން އިއުލާންކުރިއެވެ. އެހެންނަމަވެސް އިގްތިސާދު އޮތް ގޮތުން މި ވަގުތު އެ ބާވަތުގެ ކަންކަން ކުރުމަކީ އެންމެ މުނާސަބުކަމަކަށް ނުވާތީކަމަށް ބުނެ އެ އިއުލާން ނެރުނުތާ 24 ގަޑިއިރުވެސް ނުވަނީސް ވަނީ ބާތިލުކޮށްފައެވެ.
އިސްލާމީ މަރުކަޒަކީ އިސްލާމީ އެކި ގައުމުތަކުގެ އެހީގައި 1980ގެ ކުރީކޮޅު އަޅަން ފެށި މަރުކަޒެކެވެ. މިސްކިތުގެ މަސައްކަތް 10 މަސް ދުވަހުގެ ތެރޭގައި ނިންމާ ރަސްމީކޮށް މިސްކިތް ހުޅުވީ ނޮވެމްބަރު 1984ގެ ނޮވެމްބަރުމަހުގެ 11 ވަނަދުވަހު ކުރީގެ ރައީސް މައުމޫން އަބްދުލްގައްޔޫމެވެ.
އިސްލާމީ މަރުކަޒު އިމާރާަތްކޮށްފައިވަނީ މެލޭޝިއާގެ ވެރިރަށް ކުއާލަ ލަމްޕޫރުގެ ބަންގްސާގައި ހުންނަ މިސްކިތެއް ނަމޫނާއަކަށް ބަލައިގެން އެތަނާއި އެއްގޮތަށެވެ. މަރުކަޒުގެ ޑިޒައިންވެސް ކުރެހީ އެ މިސްކިތް ކުރެހި އާކިޓެކްޓެކެވެ.
