ފާއިތުވި ދުވަސްތަކުގައި އދ.އަށް ޒިޔާރަތް ކުރެއްވުމަކީ ލިބުނު ޝަރަފެއްކަން ފާހަގަކުރައްވަމުން ޝާހިދު އެކްސްގައި ވިދާޅުވީ، އިންޓަރނޭޝަނަލް ކޮމިއުނިޓީސް އޯގަނައިޒޭޝަނާއެކު އޭނާ ކުރައްވަމުން ގެންދަވާ މަސައްކަތްތަކުގެ މައުލޫމާތު އދ.ގެ ވެރިޔާއާ ހިއްސާ ކުރައްވަން ފުރުސަތު އޭނާއަށް ލިބިވަޑައިގެންނެވި ކަމަށެވެ.
އިދިކޮޅު އެމްޑީޕީގެ ރައީސް ކަމުގެ މަގާމުގައި ވެސް ހުންނެވި ޝާހިދު އިތުރަށް ވިދާޅުވީ އިންސާފުވެރިކަމާއެކު، ދެމެހެއްޓެނިވި ސުލްހަ ގާއިމުކުރުމަށް އެންމެންނަށް ވެސް އެހީތެރިވެދިނުމަށް މަސައްކަތް ކުރުމަކީ އަބަދުވެސް އަމާޒެއް ކަމަށެވެ.
މި ބައްދަލުވުމުގައި ޝާހިދާއެކު އ.ދ އިން ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދު ވެސް ބައިވެރިވެވަޑައިގެންނެވި އެވެ.
ކުރީ ސަރުކާރުގައި ފޮރިން މިނިސްޓަރުކަން ކުރެއްވި ޝާހިދު ވަނީ އ.ދ.ގެ އާންމު މަޖިލީހުގެ ރައީސްގެ މަގާމު ވެސް މީގެކުރިން ފުރުއްވާފަ އެވެ.
