ފުލުހުން މިއަދު ހާމަކުރި ގޮތުގައި، މި އެޕާޓްމަންޓްތައް ހަވާލުކުރުމަށް މި މަހުގެ 31 ވަނަ ދުވަހާ ހަމައަށް މުއްދަތު ދިނުމަށް ބައްސާމްގެ ވަކީލުން ސިޓީއަކުން އެދިފައިވެއެވެ.
މި ސިޓީއަށް ޖަވާބު ދިނުމުގެ މަސައްކަތް މިހާރު ކުރިއަށްދާ ކަމަށްވެސް ފުލުހުން ބުނެފައިވެއެވެ.
މި މައްސަލައިގައި ފުލުހުން ކުރިން ބުނެފައިވަނީ، ބައްސާމް މި ދެ އެޕާޓްމަންޓް ގަތުމަށް ބޭނުންކޮށްފައިވަނީ ކޮވިޑްގެ ދުވަސްވަރު ފީފާއިން ރާއްޖެއަށް ދިން 1.9 މިލިއަން ޑޮލަރުގެ ތެރެއިން އެއް މިލިއަން ޑޮލަރު ކަމަށެވެ.
މި ފައިސާއަކީ ރާއްޖޭގެ ކްލަބުތަކަށް ލޯނުގެ ގޮތުގައި ދޫކުރުމަށް ދެވުނު ފައިސާ ކަމަށްވެސް ފުލުހުން ފާހަގަކޮށްފައިވެއެވެ.
މި މައްސަލައިގައި ކޯޓުން ނެރުނު އަމުރާ އެއްގޮތަށް، މި ދެ އެޕާޓްމަންޓް ފުލުހުންގެ ބެލުމުގެ ދަށަށް ނެގުމަށް ކުރަންޖެހޭ މަސައްކަތްތައް ކުރަމުންދާ ކަމަށް ފުލުހުން ބުނެފައިވެއެވެ. މި މައްސަލައިގެ ތަހުގީގު ކުރިއަށްދާއިރު، އިތުރު ތަފްސީލުތައް ހާމަކުރެވޭނެ ކަމަށް ފުލުހުން ބުނެފައިވެއެވެ.
