މި މައްސަލައާ ގުޅޭގޮތުން ފުލުހުން ބުނީ މި ހާދިސާ ހިނގާފައިވަނީ މިދިޔަ އޯގަސްޓު މަހުގެ 13 ވަނަ ދުވަހު ކަމަށެވެ.
މި ހާދިސާގެ ވީޑިއޯއެއް ސޯޝަލް މީޑިއާގައި ފެތުރުމާ ގުޅިގެން ފުލުހުން ވަނީ މައްސަލަ ތަހުގީގުކުރަން ފަށާފައެވެ. އެ ވީޑިއޯގައި ފެންނަނީ "ރިލެކްސް ގޯލްޑް"، "ނަސްރު ސްޕީޑް" އަދި "ރަމްޒު ކްއީން" ނަމަކަށް ކިޔާ ތިން ލޯންޗެއް ބާރު ސްޕީޑުގައި ތޮއްޑޫ ބަނދަރުގެ ނެރަށް ވަންނަ މަންޒަރެވެ.
މ ލޯންޗުތަކުގައި ދަތުރުކުރި ފަސިންޖަރުންގެ ރައްކާތެރިކަމަށް އެކަށީގެންވާ ސަމާލުކަމެއް ދީފައިނުވާކަން ފާހަގަކުރެވެއެވެ.
ފުލުހުން ބުނެފައިވަނީ މި ތިން ކެޕްޓަނުންގެ ލައިސަންސު ވަގުތީގޮތުން ހިފެހެއްޓީ މިދިޔަ ހޮނިހިރު ދުވަހުއެވެ. އަދި މި މައްސަލައާ ގުޅޭ ލިޔެކިޔުންތައް ޓްރާންސްޕޯޓް މިނިސްޓްރީއަށް ފޮނުވުމުގެ މަސައްކަތް ކުރިއަށްދާ ކަމަށާއި، އެ މިނިސްޓްރީން މި މައްސަލައާ ގުޅިގެން އަޅާނެ ދާއިމީ ފިޔަވަޅެއް ނިންމާނެ ކަމަށް އޭނާ ވިދާޅުވިއެވެ.
މި ހާދިސާއާ ގުޅޭ ވީޑިއޯ ހިއްސާކުރި ފަރާތުން ފާހަގަކޮށްފައިވާ ގޮތުގައި، މި ތިން ލޯންޗަކީ އާންމުކޮށް ބާރު ސްޕީޑުގައި ދަތުރުކުރާ ލޯންޗުތަކެކެވެ. އަދި މި ލޯންޗުތަކުގެ ކެޕްޓަނުން ދަތުރުވެރިންގެ ފުރާނައާމެދު އެކަށީގެންވާ ވަރަށް ނުވިސްނާކަން އޭނާ ފާހަގަކުރިއެވެ.
