އިއްޔެގެ ވަގުތެއްގައި ޓާޓާ އަވަހަރާވީ މުމްބާއީގެ ބްރީޗް ކެންޑީ ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށެވެ.
" ޓާޓާ ގްރޫޕް ބައްޓަންކޮށްދެއްވި އަދި ހާއްސަކޮށް މުޅި ގައުމުގެ ފޭރާމަށް ހެޔޮ ބަދަލެއް ގެނެސްދެއްވި، ގުނާ އަދަދު ނުކުރެވޭ ފަދަ ހިދުމަތްތައް ކޮށްދެވި އާދަޔާ ހިލާފް ލީޑަރު ރަޓަން ނަވަލް ޓާޓާ އަހަރެމެންނާ ވަކިވެއްޖެކަން މި އިއުލާނުކުރަނީ ފުން ހިތާމަޔާ އެކު،" ޓާޓާ ސަންސްގެ މިހާރުގެ ޗެއާމަން ޗަންދްރަސޭކްރަން އިއްޔެ ނެރުއްވި ބަޔާނުގައިވެއެވެ.
ޓާޓާ ގްރޫޕް ދުނިޔޭގެ ވަރުގަދަ ނަމަކަށް ހެދުމުގެ މޭސްތިރިއެއްގެ ގޮތުގައި ހުންނެވީ ރަޓަން ޓާޓާއެވެ. އޭނާ ވަނީ އެ ކުންފުނީގެ ވިޔަފާރި މުޅި ދުނިޔެއަށް ފުޅާކޮށް ދުނިޔޭގެ މަޝްހޫރު ބޮޑެތި ކުންފުނިތަކެއްވެސް ގަނެފައެވެ. އޭގެތެރޭގައި ދަގަނޑު އުފައްދާ ކުންފުނި ކޯރަސް އާއި މަޝްހޫރު ކާރު ބްރޭންޑްތައް ކަމަށްވާ ޖަގްވާ އާއި ލޭންޑް ރޯވާ އަދި ދުނިޔޭގެ ދެވަނައަށް އެންމެ ބޮޑު ސައި ކުންފުނި ޓެޓްލީ ހިމެނެއެވެ. ޓާޓާގެ ވިޔަފާރި ވަނީ ސޮފްޓްވެއާ އުފެއްދުމުން ފެށިގެން ގޮސް ސްޕޯޓްސް ކާރު އުފެއްދުމާ ހިސާބަށް ފުޅާކޮށްފައެވެ.
އާކިޓެކްޗާ އަދި ސްޓްރަކްޗަރަލް އިންޖިނިއަރިން ދާއިރާއިން އެމެރިކާއިން ތައުލީމު ހާސިލުކުރެއްވި ރަޓަން ޓާޓާ އޭނާގެ އާއިލީ ވިޔަފާރިއާ ހަވާލުވެވަޑައިގަތީ 1991 ވަނަ އަހަރުއެވެ. ޓާޓާ ގްރޫޕަށް އަހަރަކު 100 ބިލިއަން ޑޮލަރަށް ވުރެ ބޮޑު އާމްދަނީއެއް ލިބެއެވެ.
