މެޓް އޮފީހުން ބުނީ ރާއްޖޭގެ ސަރަހައްދުގައި ހުޅަނގު މޫސުމްގެ ބާރުގަދަވެ ރާއްޖެއާ ދުރުން އުތުރާއި ދެކުނުގައި ދެ ކޮޅިގަނޑު އުފެދިފައިވާކަމަށެވެ. ވޭތުވެދިޔަ ހަތަރު ދުވަހު އުތުރާއި މެދު ރާއްޖެތެރޭގެ ސަރަހައްދުގައި އާއްމުވައި ގަދަވެ ވިލާގަނޑުގައި ވައި ވަރަށް ގަދަވެފައިވާކަމަށްވެސް މެޓް އޮފީހުން ބުނެއެވެ.
މެޓް އޮފީހުން ބުނީ އިއްޔެ ރޭ 23:10 ގައި ގަޑިއަކު 55 މޭލަށް ވައިގަދަވިކަމަށް ރެކޯޑްކުރެވިފައިވާކަމަށެވެ. އަދި މިއަދު 05:40 ގައި ހުޅުލެއަށް ގަޑިއަކު 58 މޭލަށް އަދި 10:46ގައި 61 މޭލު ބާރުމިނުގައި ވައިޖެހުނަކަމަށްވެސް މެޓް އޮފީހުން ބުނެއެވެ.
މެޓް އޮފީހުން ބުނީ ރާއްޖޭގެ ހުރިހާ ސަރަހައްދަކަށްވެސް ހޯމަ ދުވަހާއި ހަމައަށް އާއްމު ވައި ގަދަކޮށް ހިފަހައްޓާނެކަމަށެވެ. އެގޮތުން އުތުރާއި މެދު ރާއްޖެތެރޭގެ އަތޮޅުތަކުގައި ގަޑިއަކު 15 މޭލާ 25 މޭލާއި ދެމެދު ވައިޖެހި ބޮޑުބަޔަކަށް ގަދަވަޔާއެކު ވިއްސާރަ ކުރާނެކަމަށެވެ. އަދި ދެކުނުގެ އަތޮޅުތަކުގައި އެވްރެޖްކޮށް ގަޑިއަކު 10 މޭލާ 20 މޭލާދެމެދުގެ ބާރުމިނުގައި ވައިޖެހޭނެކަމަށް ބެލެވޭއިރު ބައެއް އަތޮޅުތަކަށް ގަދަވަޔާއި އެކު ވިއްސާރަކޮށް ގުގުރާނެކަމަށްވެސް މެޓް އޮފީހުން ބުނެއެވެ.
ގަދަވަޔާއެކު ކަނޑުތައް ގަދެވެ ބޯކޮށް ވާރޭވެހޭނެކަމަށް ލަފާކުރެވޭތީ މޫސުމަށް ސަމާލުވުމަށް ގައުމީ މުސުމާއި ބެހޭ އިދާރާއިން އިލްތިމާސްކުރެއެވެ. އަދި ކަނޑު ދަތުރުކުރާ ފަރާތްތަކުން ދަތުރަށް ފެށުމުގެ ކުރިން އެންމެ ފަހުގެ މޫސުމާއި ބެހޭ މައުލޫމާތު ހޯދުމަށްވެސް މެޓް އޮފީހުން ވަނީ އިލްތިމާސްކޮށްފައެވެ.
