އުމުރުން 38 އަހަރުގެ ނަޑާލްގެ ފަހު މުބާރާތަކަށްވާނީ އަންނަ މަހު މަލާގާގައި ބާއްވާ ޑޭވިސް ކަޕެވެ. އެ މުބާރާތުގައި ސްޕެއިން ތަމްސީލް ކުރުމަށް ފަހު ކުޅުން ހުއްޓާލާން ނިންމިކަން ނަޑާލް އިއުލާން ކުރީ މިއަދުއެވެ. އަނިޔާގެ ސަބަބުން ފާއިތުވި ދެ ސީޒަނުގައި ނަޑާލް ކުޅެފައިވަނީ ވަރަށް މަދުންނެވެ.
ބުރާސްފަތި ދުވަހު އާންމުކުރި ވީޑިއޯ މެސެޖެއްގައި ނަޑާލް ބުނީ ޕްރޮފެޝަނަލް ޓެނިސް އިން ރިޓަޔާ ކުރަން ނިންމި ކަމަށެވެ.
ނަޑާލް ރިޓަޔާ ކުރަނީ ފިރިހެން ސިންގަލްސްގެ ދެވަނައަށް އެންމެ ކާމިޔާބު ކުޅުންތެރިޔާގެ ގޮތުގަ އެވެ. 'ކިންގް އޮފް ކްލޭ'ގެ ނަމުން މަޝްހޫރު ނަޑާލް ފްރެންޗް އޯޕަން ސިންގަލްސް ޗެމްޕިއަންކަން ރެކޯޑަކަށް 14 ފަހަރު ހޯދައި، ރޯލަންޑް ގާރޯސްގައި ކުޅުނު ބޮޑެތި 116 މެޗުގެ ތެރެއިން 112 މެޗު ކާމިޔާބުކުރި އެވެ. އެއް މުބާރާތެއްގައި އެހާ ގިނަ ގްރޭންޑް ސްލޭމް ސިންގަލްސް ތަށި އެއްވެސް ކުޅުންތެރިއަކު ހޯދާފައެއް ނުވެއެވެ.
ނަޑާލް އަކީ ހަތަރު ފަހަރު ޔޫއެސް އޯޕަން ޗެމްޕިއަންކަން ވެސް ހޯދާފައިވާ އަދި އޮސްޓްރޭލިއަން އޯޕަން އަދި ވިމްބަލްޑަން ވެސް ދެ ފަހަރު ކާމިޔާބުކޮށްފައިވާ ކުޅުންތެރިއެކެވެ. އަދި އޮލިމްޕިކް ސިންގަލްސް އަދި ޑަބަލްސް ގޯލްޑް ހޯދައި، ސްޕެއިން އަށް ޑޭވިސް ކަޕްގެ ހަތަރު ފައިނަލް ކާމިޔާބުކޮށްފައިވެއެވެ.
