މި އެލާޓް ދެމިއޮންނާނީ މިއަދު ހެނދުނު 6:00 އިން މެންދުރު 12:00 އާ ހަމައަށެވެ.
މޫސުމާބެހޭ އިދާރާއިން ބުނީ މި ވަގުތުތަކުގައި ގަޑިއަކު 19 މޭލާއި 24 މޭލާ ދެމެދުގެ ބާރު މިނުގައި ވައި ޖެހޭނެ ކަމަށެވެ. އަދި ވިލާގަނޑުގައި 40 މޭލަށް ވައި ގަދަވާނެ ކަމަށް ލަފާކޮށްފައިވެ އެވެ. މީގެ އިތުރުން ކަނޑުތައް ވެސް ގަދަވާނެ ކަމަށް އެ އިދާރާއިން ލަފާކުރެ އެވެ.
އިއްޔެ ވެސް ށ. އަތޮޅުން ފ. އަތޮޅަށް ކަނޑުތަކާއި ވައި ގަދަވާނެ ކަމަށް ލަފާކޮށް ޔެލޯ އެލާޓު ނެރުނެވެ. މި އެލާޓު ދެމިއޮތީ އިއްޔެ އިރުއޮއްސުނު 7:00 އިން މިރޭ 23:00 އާ ހަމައަށެވެ. މި ސަރަހައްދުތަކަށް ގަޑިއަކު 25 މޭލާއި 30 މޭލު ބާރުމިނުގައި ވައި ޖެހޭނެ ކަމަށާއި ވިލާގަނޑުގައި ގަޑިއަކު 50 މޭލަށް ވައި ގަދަވާނެ ކަމަށް ލަފާކުރެވުނެވެ.
މިދިޔަ ފަސް ދުވަހު ރާއްޖޭގެ އެކި ސަރަހައްދުތަކަށް ވިއްސާރަ ކުރަމުން އަންނަ ކަމަށް ވެސް މޫސުމާބެހޭ އިދާރާއިން ފާހަގަކޮށްފައިވެ އެވެ. މިގޮތުން މާލެއަށް މިއަދު ކުރި ވިއްސާރައިގައި މާވެޔޮމަގު ކައުންޓްލައިން ފިހާރަ ސަރަހައްދުގައި ހުރި ބޮޑު ގަހެއް ވެއްޓި، އެ ސަރަހައްދުގައި ޕާކުކޮށްފައިހުރި ބައެއް އުޅަނދުތަކަށް ގެއްލުންވިއެވެ.
