މަރުކަޒަށް 40 އަހަރުފުރޭ މުނާސަބަތާއި ދިމާކޮށް މުންނާރު ކައިރީ މަސްފެންގަނޑެއް ހަދައިދޭނެ ބަޔަކު ހޯދުމަށް އިސްލާމިކް މިނިސްޓްރީން މިމަހުގެ 2 ވަނަދުވަހު އިއުލާންކުރިއެވެ. އެހެންނަމަވެސް އިގްތިސާދު އޮތް ގޮތުން މި ވަގުތު އެ ބާވަތުގެ ކަންކަން ކުރުމަކީ އެންމެ މުނާސަބުކަމަކަށް ނުވާކަމަށް ބުނެ ޖެހިގެން އައި ދުވަހު ކުރިން ކުރި އިއުލާން ބާތިލުކުރިކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވިއެވެ.
މުންނާރު ކައިރީ އޮންނަ މަސްފެންގަނޑު ހަދައިދޭން ސްޓެލްކޯއިން ޝައުގުވެރިކަން ފާޅުކޮށްފައިވާކަން އެ ކުންފުނިން ބުނީ މިމަހުގެ ހަތް ވަނދުވަހުއެވެ. ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވީ އިސްލާމީ މަރުކަޒުގެ މުންނާރުގެ ދަށުގައިވާ މަސްފެންގަޑު ހެދުމަށް ޝައުގުވެރިކަން ފާޅުކުީ އެތަނަކީ ތާރީހީ މުހިންމުކަމެއް ލިބިފައިވާ ތަނެއްކަށްވުމުންކަމަށެވެ. އަދި އެ ހާއްސަކަން އެ ގޮތުގައި ބޭއްވުމަށް އެ މަސްފެންގަނޑު އަލުން ރީތިކޮށް އެންމެންގެ ލޯބި ލިބޭތަނަކަށް އެތަން ހެދުންކަަން ފަހުމީ ފާހަގަކުރެއްވިއެވެ.
މުންނާރުގެ ތިރި ބަންދުކޮށްފައިވާ ފޮޓޯއެއް ހިއްސާކުރައްވަމުން ފަހުމީ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މުންނާރު މަސްފެންގަނޑުގެ އަމަލީ މަސައްކަތް ފަށާފައިވާކަމަށެެވެ. ސްޓެލްކޯއިން މި މަސައްކަތް ކުރަމުން އަންނަނީ އެކުންފުނީގެ ސީއެސްއާރުގެ ދަށުންނެވެ.
އިސްލާމީ މަރުކަޒަކީ އިސްލާމީ އެކި ގައުމުތަކުގެ އެހީގައި 1980ގެ ކުރީކޮޅު އަޅަން ފެށި މަރުކަޒެކެވެ. މިސްކިތުގެ މަސައްކަތް 10 މަސް ދުވަހުގެ ތެރޭގައި ނިންމާ ރަސްމީކޮށް މިސްކިތް ހުޅުވީ ނޮވެމްބަރު 1984ގެ ނޮވެމްބަރުމަހުގެ 11 ވަނަދުވަހު ރީގެ ރައީސް މައުމޫން އަބްދުލްގައްޔޫމެވެ.
އިސްލާމީ މަރުކަޒު އިމާރާަތްކޮށްފައިވަނީ މެލޭޝިއާގެ ވެރިރަށް ކުއާލަ ލަމްޕޫރުގެ ބަންގްސާގައި ހުންނަ މިސްކިތެއް ނަމޫނާއަކަށް ބަލައިގެން އެތަނާއި އެއްގޮތަށެވެ. މަރުކަޒުގެ ޑިޒައިންވެސް ކުރެހީ އެ މިސްކިތް ކުރެހި އާކިޓެކްޓެކެވެ.
