ލަންކާގެ ނޫސްތަކުން ރިޕޯޓު ކޮށްފައިވާ ގޮތުން މި ކަންބޮޑުވުންތަކުގެ ތެރޭގައި، ރާއްޖެ އަށް ލިބިދޭ ބާރުތަކާ މެދު ހިތްހަމަނުޖެހުން ފާޅުކޮށްފައިވެއެވެ.
މިގޮތުން، ސްރީލަންކާގެ ބައެއް ޔޫނިއަންތަކުން ވަނީ ދިވެހިންނަށް އެ ގައުމުގެ ބަނދަރުތަކާއި އެއާޕޯޓުތައް ބޭނުން ކުރުން ހުއްޓާލުމަށް ގޮވާލާފަ އެވެ.
މީގެ އިތުރުން، ލަންކާ ނޫސްތަކުން ރިޕޯޓުކޮށްފައިވާ ސްރީލަންކާގައި ދިރިއުޅޭ 56،000 އަށްވުރެ ގިނަ ދިވެހިންނާ މެދުވެސް ކަންބޮޑުވާކަމަށް ބައެއް ޔޫނިއަންތަކުން ވަނީ ބުނެފައެވެ. މީގެ ތެރޭގައި ގާތްގަނޑަކަށް 1،700 ކުދިން ސްރީ ލަންކާގެ ސަރުކާރު ސްކޫލުތަކުގައި ކިޔަވަމުންދާ ކަމަށާއި، ގިނަ ދިވެހިން އެ ގައުމުގެ ހިލޭ ސިއްހީ ހިދުމަތް ބޭނުން ކުރާ ކަމަށް ވެސް ލަންކާ ބައެއް މީހުން އަންނަނީ ތުހުމަތު ކުރަމުން ނެވެ. މިކަމަކީ ސްރީ ލަންކާގެ ޓެކްސް ދައްކާ ފަރާތްތަކަށް އިތުރު ބުރައެއް ކަމަށް ވެސް ބުނެފައިވެ އެވެ.
މި ހުރިހާ ކަމަކާ ގުޅިގެން، ލަންކާގެ ސަރުކާރުން އަވަސް ފިޔަވަޅުތަކެއް އެޅުމަށް ގޮވާލުންތައް އިތުރުވަމުންދާކަމަށް ރިޕޯޓުތައް ބުނެ އެވެ. މީގެ ތެރޭގައި ދިވެހިންނަށް ވިސާ ދޫކުރުމުގައި އިތުރު ހަރުކަށި ގަވާއިދުތަކެއް ތައާރަފު ކުރުމާއި، ސްރީ ލަންކާގައި ދިރިއުޅޭ ދިވެހިންގެ އަދަދު މަދުކުރުމަށް މަސައްކަތް ކުރުން ހިމެނެ އެވެ.
އިމިގްރޭޝަނާ ގުޅޭ ގޮތުން ރާއްޖެއާއެކު ވެފައިވާ އެއްބަސްވުމުން ލަންކާ ރައްޔިތުން ކަންބޮޑުވުން ފާޅުކޮށްފައިވާކަންކަން:
- ދިވެހިރާއްޖެ އަށް ލިބިދޭ ބާރުތައް: މި އެއްބަސްވުމުގެ ދަށުން، ދިވެހި އިމިގްރޭޝަން އޮފިޝަލުންނަށް ސްރީލަންކާގެ ރައްޔިތުން ތަހުގީގެއް ނުކޮށް ޑިޕޯޓު ކުރުމުގެ ބާރު ލިބިދެ އެވެ. މިކަމާ ގުޅިގެން ބާރުގެ ބޭނުން ނަހަމަ ގޮތުގައި ބޭނުން ކުރެވިދާނެ ކަމުގެ ކަންބޮޑުވުން ވަނީ ފާޅުކޮށްފަ އެވެ.
- ކުދިންނާ ގުޅޭ މައްސަލަތައް: ސްރީލަންކާގެ މީހަކާ އިނދެގެން އުޅޭ ދިވެއްސަކަށް، ސްރީލަންކާގެ އިމިގްރޭޝަނަށް އެންގުމަކާ ނުލައި ކުދިން ރާއްޖެ އަށް ގެންދިއުމުގެ ހައްގު ލިބިދެ އެވެ. އެހެން ނަމަވެސް، ދިވެއްސަކާ އިނދެގެން އުޅޭ ސްރީލަންކާގެ މީހަކަށް މި ހައްގު ލިބިދީފައެއް ނުވެ އެވެ.
- ޑިޕޯޓޭޝަނާ ގުޅޭ މައްސަލަތައް: މި އެއްބަސްވުމުގެ ދަށުން ސްރީލަންކާގެ ބައެއް ރައްޔިތުން ވަނީ ސުވާލު އުފެދޭ ގޮތަކަށް ޑިޕޯޓުކުރެވިފައިކަމަށް ބުނެ ޝަކުވާ ކުރެ އެވެ. މިސާލަކަށް ނަދީޝް ޕެރޭރާ ނަމަކަށް ކިޔާ ސްރީލަންކާގެ މީހަކު ގޭތެރޭގެ އަނިޔާގެ ތުހުމަތުގައި ޑިޕޯޓުކުރެވުނު ކަމަށް ބުނެވެ އެވެ.
- މާލީ ކަންކަން: ދިވެހި ސަރުކާރުން ސްރީ ލަންކާގެ ސަރުކާރުގެ ބޭންކުތަކުން ނަގާފައިވާ 750 މިލިއަން ޑޮލަރަށްވުރެ ގިނަ އަދަދެއްގެ ލޯނުތަކަށް ސޮވްރިން ގެރެންޓީ ދީފައިވާ ކަމަށް ބުނެވެ އެވެ.
- ވިސާ އާ ގުޅޭ ކަންކަން: ރާއްޖެ އިން ޓެރަރިސްޓު ޖަމާއަތްތަކަށް ޕާސްޕޯޓު ދޫކޮށްފައިވާ ކަމަށް ތުހުމަތު ކުރެވޭތީ، ސްރީލަންކާ އަށް އަންނަ ދިވެހިންނަށް ވިސާ ދިނުމުގައި ހަރުކަށި ގަވާއިދުތަކެއް ގެންގުޅުމަށް ގޮވާލާފައިވެ އެވެ.
