މި ފުރުސަތު ހުޅުވާލީ ދުނިޔޭގެ އީ-ވޭސްޓް ނުވަތަ އިލެކްޓްރޯނިކް ކުނީގެ ދުވަސް ފާހަގަކުރުމުގެ ގޮތުންނެވެ.
ވެމްކޯއިން ބުނީ އޮކްޓޫބަރު 14 ވަނަ ދުވަހު ހެނދުނު 9:00 އިން ރޭގަނޑު 10:00 އަށް މާލެ، ހުޅުމާލެ، އަދި ވިލިމާލޭގައި ހުރި ވެމްކޯގެ ޓްރާންސްފާ ސްޓޭޝަންތަކުން މި ހިލޭ ހިދުމަތް ލިބެން ހުންނާނެ ކަމަށެވެ. މި ފުރުސަތުގެ ސަބަބުން، ރައްޔިތުންނަށް އެމީހުންގެ ބޭނުން ހަމަވެފައިވާ އިލެކްޓްރޯނިކް ތަކެތި ރަނގަޅު ގޮތުގައި ނައްތާލުމަށް ފަސޭހަވެގެންދާނެއެވެ.
އީ-ވޭސްޓް ދުވަސް ފާހަގަކުރަނީ ކޮންމެ އަހަރެއްގެވެސް އޮކްޓޫބަރު 14 ގައެވެ. މިއީ އީ-ވޭސްޓް ރީސައިކަލް ކުރުމުގެ މުހިންމުކަން އާންމުންގެ މެދުގައި ހޭލުންތެރިކުރުވުމަށް 2018 ވަނަ އަހަރު ވޭސްޓް ފްރޮމް އިލެކްޓްރިކަލް އެންޑް އިލެކްޓްރޯނިކް އިކުއިޕްމަންޓް (ޑަބްލިޔުއީއީ) ފޯރަމްއިން ތަޢާރަފުކުރި ދުވަހެކެވެ.
މި ހަރަކާތުގެ ސަބަބުން ތިމާވެށި ހިމާޔަތްކުރުމަށާއި އިލެކްޓްރޯނިކް ކުނީގެ ސަބަބުން ކުރިމަތިވާ ގެއްލުންތައް ކުޑަކުރުމަށް އެހީތެރިވެގެންދާނެ ކަމަށް ވެމްކޯއިން ބުނެފައިވެއެވެ. އަދި މިފަދަ ހަރަކާތްތައް ކުރިއަށް އޮތް ތަނުގައިވެސް ބޭއްވުމަށް ރޭވިފައިވާ ކަމަށް ވެމްކޯއިން މައުލޫމާތު ދީފައިވެއެވެ.
