މި ފުރުސަތުތައް ހުޅުވިގެންދާނީ "އެމްޕަވަމަންޓް ހަބް" ގެ ނަމުގައި ގާއިމުކުރާ ހާއްސަ މަރުކަޒެއްގެ ގޮތުގައެވެ.
ޖެންޑާ މިނިސްޓްރީން ބުނީ މި މަރުކަޒަކީ ނުކުޅެދުންތެރިކަން ހުންނަ މީހުންނަށް ހުނަރު ދަސްކޮށްދީ، އެމީހުންގެ އުފެއްދުންތައް ވިއްކައި، ވަޒީފާ އަދާކުރެވޭނެ ފަދަ ތަނެއް ކަމަށެވެ. މީގެ ސަބަބުން އެމީހުންނަށް ބޭނުންވާ ހުނަރުތައް ދަސްކުރުމުގެ ފުރުސަތު ލިބި، އެމީހުންގެ ގާބިލުކަން އިތުރުވެ، އަމިއްލަ މަސައްކަތްތައް ފަށައި، އާމްދަނީ ހޯދުމުގެ ދޮރު ހުޅުވިގެންދާނެ ކަމަށް މިނިސްޓްރީން ބުންޏެވެ.
މި މަރުކަޒުގައި ނުކުޅެދުންތެރިކަން ހުންނަ މީހުންގެ އުފެއްދުންތައް ވިއްކުމުގެ ފުރުސަތު ލިބިގެންދާނެ ކަމަށް މިނިސްޓްރީން ބުނެފައިވެއެވެ. އަދި މިއީ އެމީހުންގެ ހުނަރާއި ގާބިލުކަން ދައްކުވައިދިނުމުގެ ރަނގަޅު ފުރުސަތެއް ކަމަށްވެސް ބުނެފައިވެއެވެ. މީގެ އިތުރުން، ވިޔަފާރިތަކަށްވެސް ނުކުޅެދުންތެރިކަން ހުންނަ މަސައްކަތްތެރިން ހޯދުމުގެ ފުރުސަތު ލިބިގެންދާނެ ކަމަށް މިނިސްޓްރީން ބުނެފައިވެއެވެ.
މި މަރުކަޒަކީ ނުކުޅެދުންތެރިކަން ހުންނަ މީހުންނަށް އެއްވެސް ހުރަހަކާ ނުލައި ފަސޭހަކަމާއެކު ބޭނުންކުރެވޭނެ ފަދަ ތަނެއްގެ ގޮތުގައި ފަރުމާކުރެވޭނެ ކަމަށް މިނިސްޓްރީން ބުނެފައިވެއެވެ. އެމްޕަވަމަންޓް ހަބް ގާއިމުކުރުމަށް މި މަރުކަޒު ހިންގާނެ ގޮތުގެ މޮޑެލް ފައިނަލް ކުރުމާއި މަރުކަޒު ހިންގާނެ ޖާގަ ކަށަވަރުކުރުމުގެ މަސައްކަތް މިހާރު ދަނީ ކުރިއަށް ކަމަށްވެސް މިނިސްޓްރީން ބުނެފައިވެއެވެ.
