ރާއްޖޭގައި އުޅޭ ހުރިހާ ބިދޭސީންގެ ފޮޓޯ އަދި އިނގިލީގެ ނިޝާން ނަގަމުން އަންނަ އޮޕަރޭޝަން "ކުރަނގި" ހޯމް މިނިސްޓްރީން ފެށީ މިދިޔަ މޭމަހުގެ 2 ވަނަދުވަހު ހިންމަފުށިންނެވެ.
މުޅި ރާއްޖެއަށް ފުޅާކޮށްފައިވާ މި އޮޕަރޭޝަންގައި މިވަގުރު ރާއްޖޭގައި މީހުން ދިރިއުޅޭ 45 ރަށެއްގައި ކުރިޔަށްދާކަމަށް ހޯމް މިނިސްޓްރީން ބުނެއެވެ. މި އޮޕަރޭޝަންގެ ތެރެއިން މިހާތަނަށް 4272 ބިދޭސީއެއްގެ ބަޔޮމެޓްރިކް ޑާޓާ އެއްކޮށްފައިވާކަމަށްް އެ މިނިސްޓްރީން ބުނެއެވެ.
މި އޮޕަރޭޝަންގެ ތެރެއިން މިހާތަނަށް 8 ރަށެއްގައި އުޅޭ ހުރިހާ ބިދޭސީންގެ މައުލޫމާތު އެއްކޮށް ނިންމާފައިވާކަމަށްވެސް ހޯމް މިނިސްޓްރީން ބުނެއެވެ.
މިނިސްޓްރީގެ ހިސާބުތައް ދައްކާގޮތުން އެންމެ ބިދޭސީން ގިނައީ ލޯކަލް ޓޫރިޒަމްގެ ވިޔަފާރީގައި އެންމެ ކުރީގައި އޮތް ކ. އަތޮޮޅު މާފުށީގައެވެ. އެރަށުގައި ތިބި 1076 ބިދޭސީއެއްގެ މައުލޫމާތު މިނިސްޓްރީން ވަނީ ނަގާފައެވެ. ދެވަނައަށް އެންމެ ބިދޭސީން ގިނަ ކ. ހިންމަފުށީގައި 701 ބިދޭސީން އެބަތިއްބެވެ. މި އެންމެންގެ މައުލޫމާތުތައްވެސް ވަނީ ނަގާފައެވެ.
މި އޮޕަރޭޝަންގެ ބިދޭސީންގެ އިނގިލީގެ ނިޝާން ނެގުމަށްފަހު ގަވައިދާ ހިލާފަށް އުޅޭ ބިދޭސީން ގަވައިދަށް ފެއްތުމަށް ފަސޭހަ އިންތިޒާމުތަކެެއް ހަމަޖައްސާނެކަމަށް ހޯމް މިނިސްޓްރީން ވަނީ ބުނެފައެވެ. އަދި އެއްވެސް އައިޑެންޓީއެއް ނެތް މީހުން އެމީހުންގެ ގައުމަތަކާއި ގުޅި ޓްރެވަލް ޑޮކިއުމެންޓް ހަދާ އެމީހުން ފޮނުވާލާނެކަމަށް ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަ 3 އަހަރުގެ ތެރޭގައި ހައްލުކުރައްވާނެކަމަށް މިނިސްޓަރު އަލީ އިހްސާން ވަނީ ވިދާޅުވެފައެވެ.
