ވޭފް އެތެރެކުރުމާއި ބޭނުންކުރުން ރާއްޖޭގައި މަނާކުރަން ކަމާއި ގުޅޭ އިދާރާތަކަށް އެންގެވިކަން ރައީސް ޑރ. މުހައްމަދު މުއިއްޒު މިއަދު އިރު އޮއްސެނިކޮށް ވަނީ އިއުލާންކުރައްވާފައެވެ.
ރައީސް ޑރ. މުއިއްޒުގެ ނިންމެވުމުގައި ވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ މަހުގެ 15 ދުވަހުން ފެށިގެން މަނާކުރަން ކަމާއި ގުޅޭ އިދާރާތަކަށް އަންގަވާފައިވާކަމަށެވެ.
މީގެއިތުރުން ޑިސެމްބަރު މަހުގެ 15 އިން ފެށިގެން ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުމަކީވެސް މަނާކަމެއްގެ ގޮތުގައި ކަނޑައެޅުމަށް ކަމާއި ބެހޭ އިދާރާތަކަށް އަންގަވާފައިވާކަމަށް ރައީސް ވަނީ ވިދާޅުވެފައެވެ.
މިކަމާއި ގުޅިގެން ހޯމް މިނިސްޓަރު އަލީ އިހްސާން ވިދާޅުވީ ރައީސްގެ މި ނިންމެވުމަކީ ދިވެހި މި ގައުމު ތާ އަބަދަށް ޝުކުރުވެރިވާނެ ނިންމެވުމެއްކަމަށެވެ.
ވޭޕް މަނާކުރަން ރައީސް ނިންމަވާފައި މިވަނީ ވޭފްގެ ނުރައްކާ ބޮޑުވެ އެތަކަތި މަނާކޮށްދިނުމަށް ޑޮކްޓަރުންނާއި ސިއްހީ މާހިރުންގެ އިތުރުން ސްކޫލްތަކުގެ ޓީޗަރުންނާއި ގިނަ އަދަދެއްގެ އާއްމުންވެސް ގޮވާލާފައި ވަނިކޮށެވެ.
