ނިޔާވި ޑަރައިވަރަކީ 45 އަހަރުގެ ދިވެހި ފިރިހެނެކެވެ.
ލަގެޖު އުފުލާ އެއާޕޯޓު ވެހިކަލެއް ދުއްވާފައި ދަނިކޮށް ލައިޓް އާއި ކެމެރާ ހަރުކޮށްފައި ހުރި ބުޑުގަނޑެއްގައި ޖެހިފައިވާއިރު ދުއްވަން އިން ޑްރައިވަރު މީހާ ކްލިނިކް އަށް ގެންގޮސް އަދި އޭގެ ފަހުން އައިޖީއެމްއެޗްއަށް ގެންގޮސްފައިވާކަމަށް ފުލުހުން ބުނެއެވެ. މި ހާދިސާ ފުލުހުންނަށް ރިޕޯޓްކޮށްފައިވަނީ މިއަދު ހެދުނު 9:28 ހާއިރުއެވެ.
ފުލުހުން ބުނީ ޑަރައިވަރު މީހާ ކްލިނިކް އަށް ގެންދިޔައިރު ވެސް ނިޔާވެފައިވާކަމަށް މައުލޫމާތު ލިބިފައިވާކަމަށެވެ. އަދި އައިޖީއެމްއެޗްއަށް ގެންގޮސް އިތުރަށް ބަލާ ބޭރުފުށަށް ވެސް އެއްވެސް އަނިޔާއެއް ފެންނަށް ނެތްކަމަށް ހޮސްޕިޓަލް އިން ފުލުހުންނަށް މައުލޫމާތު ދީފައިވާކަމަށް ފުލުހުން ބުނެއެވެ.
ފުލުހުން ބުނީ ވެހިކަލް ޖެހުނު ލައިޓްއާއި ކެމެރާ ހަރުކޮށްފައި ހުރި އެ ސްޓްރަކްޗާއަކީ އެއާޕޯޓް އޭޕްރޮން ސަރަހައްދުގައި ހުރި ސްޓްރަކްޗާއެއް ކަމަށެވެ.
އެމްއޭސީއެލްގެ މުވައްޒަފު އާދަމް އަސަލްމް ނިޔާވުމާ ގުޅިގެން އެކުންފުނިން ވަނީ ތައުޒިޔާ ކިޔާފައެވެ. އޭނާ އެމްއޭސީއެލްއަށް ކުރި ހިދުމަތަށް ޝުކުރުއަދާ ކުރާކަމަށް ވެސް ކުންފުނިން އެ ކުންފުނިން ބުނެއެވެ.
މިހާދަިސާއާ ގުޅިގެން ބަލަން ޖެހޭ އިތުރުކަންކަން ބަލާ ތަހުގީގުކުރަމުން ދާކަމަށް ފުލުހުން ބުނެއެވެ.
