އެންވަޔަރަންމަންޓް ޕްރޮޓެކްޝަން އޭޖެންސީ (އީޕީއޭ) އިން މިއަދު ހާމަކުރި މައުލޫމާތުގައިވާ ގޮތުން، މި ހާދިސާގައި ފަރުގެ 1،159 އަކަމީޓަރުގެ ސަރަހައްދަކަށް ވަނީ ވަރަށް ބޮޑަށް ގެއްލުން ލިބިފައެވެ.
އީޕީއޭ އިން ބުނީ ފަރަށް އެރި އުޅަނދުތަކަކީ ޔޫއޭއީގެ ކުންފުންޏެއް ކަމަށްވާ ދި މިޑްލް އީސްޓް މެރިން އެލްއެލްސީގެ ޓަގު "އަނަންދި" އާއި ބާޖު "އޭއެމް މަނުމިތު" ކަމަށެވެ. މި އުޅަނދުތައް ފަރަށް އެރީ ފެބްރުއަރީ 21 ވަނަ ދުވަހު ކަމަށާއި، އެޕްރީލް 23 ވަނަ ދުވަހާ ހަމައަށް އެ އުޅަނދުތައް ފަރުމަތީގައި އޮތް ކަމަށް އީޕީއޭ އިން ބުންޏެވެ.
ފަރަށް ލިބުނު ގެއްލުން ވަޒަންކުރުމަށް އުޅަނދުތަކުގެ ވެރިފަރާތުން ހަމަޖެއްސި ސާވޭޔަރުންނާއެކު އީޕީއޭ އިން ޖޮއިންޓް ސާވޭއެއް ހަދާފައިވެއެވެ. މި ސާވޭގެ ނަތީޖާއަށް ބިނާކޮށް، ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން ހަދާފައިވާ ގަވާއިދުގެ ދަށުން އުޅަނދުތަކުގެ ވެރިފަރާތް 29،201،946 ރުފިޔާއިން ޖޫރިމަނާކޮށްފައިވާ ކަމަށް އީޕީއޭ އިން ހާމަކުރިއެވެ.
އީޕީއޭ އިން އިތުރަށް ބުނީ ޖޫރިމަނާގެ ފައިސާ ދެއްކުމަށް މި މަހުގެ ފުރަތަމަ ދުވަހުން ފެށިގެން 30 ދުވަހުގެ މުއްދަތެއް ދީފައިވާ ކަމަށެވެ. ނަމަވެސް، މީގެ ކުރިން މިފަދަ ހާދިސާތަކުގައި ޖޫރިމަނާކުރެވުނު ފަރާތްތަކުން ގިނަ ފަހަރަށް ޖޫރިމަނާގެ ފައިސާ ދައްކާފައި ނުވާކަން ފާހަގަކުރެވެއެވެ. މިސާލަކަށް، 2022 ވަނަ އަހަރު ހުޅުމާލޭ އިރުމަތީ ފަރާތު ފަރަށް ލިބުނު ގެއްލުމަކާ ގުޅިގެން 200،000 ރުފިޔާއިން ޖޫރިމަނާކުރެވުނު ކުންފުންޏަކުން މިހާތަނަށް ވެސް އެ ފައިސާ ދައްކާފައި ނުވާކަން ފާހަގަކުރެވެއެވެ.
