ހަޔާ އެޑިއުކޭޝަނުގެ ސްޓޭޓް މިނިސްޓަރުކަމުން ބަދަލުކުރުމާއެކު ފައިރޫޝް އެކްސްގައި ވަނީ ޕޯސްޓެއް ވެސް ކުރައްވައިފަ އެވެ.
އެ ޕޯސްޓެއްގައި ވަނީ ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާއާއި އެ މިނިސްޓްރީގެ ޓީމުން ދިން އެއްބާރުލުމަށް ޝުކުރު އަދާ ކުރައްވައިފަ އެވެ. ނަމަވެސް އެހެން މިނިސްޓްރީއަކަށް އޭނާ ބަދަލުވިކަން އެ ޕޯސްޓުގައި ހާމަކޮށްފައެއް ނުވެ އެވެ.
ހޯމްލޭންޑް ސެކިއުރިޓީ މިނިސްޓްރީގެ އިސް އޮފިޝަލަކު ދިން މައުލޫމާތުން ހާމަވާ ގޮތުގައި މިދިޔަ އާދިއްތަ ދުވަހު ފައިރޫޝް އެ މިނިސްޓްރީ އަށް ވަޒީފާ އަށް ނުކުންނަވަން ފައްޓާފައިވާ ކަން ޔަގީންވެ އެވެ. ފައިރޫޝް، ހޯމްލޭންޑް މިނިސްޓްރީގައި ވެސް އަދާކުރައްވަނީ ސްޓޭޓް މިނިސްޓަރުކަމެވެ.
ފައިރޫޝް މަސައްކަތް ކުރައްވާ މިނިސްޓްރީ ބަދަލުކޮށްފައި މިވަނީ ރާއްޖެއަށް ދިމާވެފައިވާ މާލީ ކާރިސާއާ ގުޅިގެން ދައުލަތުގެ ހަރަދުކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރަން ނިންމަވާފައިވާކަން ރައީސް ޑރ. މުހައްމަދު މުއިއްޒު އިއުލާނުކުރައްވާފައި ވަނިކޮށެވެ.
އިއްޔެ އެކްސް އެކައުންޓުން ކުރެއްވި ޕޯސްޓެއްގައި ރައީސް ވިދާޅުވީ، މި ބަދަލާއެކު މަހެއްގެ މައްޗަށް 5.7 މިލިއަން ރުފިޔާ ސަލާމަތް ކުރެވޭނެ ކަމަށް އެމަނިކުފާނު ވަނީ ވިދާޅުވެފަ އެވެ. އޭގެ ތެރޭގައި ހިމެނެނީ ހަތް ސްޓޭޓް މިނިސްޓަރުން, 43 ޑެޕިއުޓީ މިނިސްޓަރުން, 109 ސީނިއާ ޕޮލިޓިކަލް ޑިރެކްޓަރުން, އަދި 69 ޕޮލިޓިކަލް ޑިރެކްޓަރުންނެވެ.
އިއްޔެ އިން ފެށިގެން ކުރިއަށް އޮތް 15 ދުވަހުގެ ތެރޭގައި އެ މުވައްޒަފުން ވަކިކުރަން ރައީސް ވަނީ އަންގަވައިފަ އެވެ.
