"ދިވެހީންގެރާއްޖެ މެންބަރު" ޕްރޮގްރާމްގައި ވާހަކަދައްކަމުން، މެންބަރު މުސްތަފާ ވިދާޅުވީ ރައީސް ޑރ. މުހައްމަދު މުއިއްޒުގެ ރިޔާސީ ވައުދާ އެއްގޮތަށް ރައްޔިތުންނަށް ބުރަވާ ގޮތަށް އެއްވެސް ޓެކްސްއެއް ބޮޑުނުކުރާނެ ކަމަށެވެ.
އޭނާ ފާހަގަކުރެއްވި ގޮތުގައި ރައީސް މުއިއްޒު މިފަދަ ވައުދެއް ވެވަޑައިގަތީ ކުރީގެ ސަރުކާރުން ޖީއެސްޓީއާއި ޓީ-ޖީއެސްޓީއަށް ބަދަލުގެނެސް، ޓެކްސް ބޮޑުކުރުމުން ރައްޔިތުންނަށް ބުރަބޮޑުވުމުގެ ސަބަބުންނެވެ.
ޓޫރިޒަމް ދާއިރާއިން ނަގާ ޓެކްސް 16 ޕަސަންޓުން 17 ޕަސަންޓަށް ބޮޑުކުރުމަށް ސަރުކާރުން ބިލެއް މަޖިލީހަށް ހުށަހަޅާފައިވެއެވެ. މި ބިލު ހުށަހެޅުއްވީވެސް މެންބަރު މުސްތަފާއެވެ. މި ބިލުގެ އިބްތިދާއީ ބަހުސް ނިންމައި، އިތުރަށް ދިރާސާކުރުމަށް ކޮމިޓީއަށް ފޮނުވާފައިވެއެވެ.
ބިލުގައިވާ ގޮތުން، އަންނަ އަހަރުގެ ޖޫން މަހުން ފެށިގެން ޓީޖީއެސްޓީ 17 ޕަސަންޓަށް ބޮޑުކުރުމަށް ހުށަހަޅާފައިވެއެވެ. މިގޮތަށް ބަދަލުކުރުމުން ދައުލަތަށް އިތުރު 200 މިލިއަން ރުފިޔާ ލިބޭނެ ކަމަށް ލަފާކުރެވެއެވެ. ނަމަވެސް، މެންބަރު މުސްތަފާ ބުނެފައިވަނީ މިއީ ދިވެހިރާއްޖޭގެ އެއްވެސް ރައްޔިތެއްގެ އަތުން ނަގާ ޓެކްސްއަކަށް ބަދަލެއް އަންނަ ކަމެއް ނޫން ކަމަށެވެ.
