މިކަން ފާހަގަކުރެއްވީ ބަނޑޮހުގައި ބޭއްވުނު އެއް ދުވަހުގެ ޑޭޓާ ފޯރަމްގައި ވާހަކަފުޅު ދައްކަވަމުންނެވެ.
ގިޔާސް ވިދާޅުވި ގޮތުގައި ރާއްޖޭގައި ޓޫރިޒަމް ފެށުނީއްސުރެ ޑޭޓާ ނަގަމުން އަންނަ ކަމަށާއި، މިކަމުގެ ސަބަބުން ޓޫރިޒަމް އިތުރަށް އިޝްތިހާރު ކުރުމަށް ފަސޭހަވެގެންދާ ކަމަށެވެ. އަދި ޑޭޓާގެ ބޭނުން ހިފުމަކީ ޓޫރިޒަމް ސިނާއަތުގެ މުސްތަގުބަލަށް ކޮންމެހެން ކުރަންޖެހޭ ކަމެއް ކަމަށް އެމްއެމްޕީއާރްސީގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވިއެވެ.
މި ފޯރަމަކީ ރާއްޖޭގައި ފުރަތަމަ ފަހަރަށް ޓޫރިޒަމަށް ހާއްސަކޮށްގެން ބޭއްވުނު ގްލޯބަލް ޑޭޓާ ފޯރަމެކެވެ. މި ފޯރަމްގައި ޓްރިޕް އެޑްވައިޒަރ، ބުކިން ޑޮޓްކޮމް، އަޑާރާ، ޔޫނިއަން ޕޭ، އަދި އަމަޑިއުސް ފަދަ ބޮޑެތި ކުންފުނިތަކުގެ އިތުރުން ރާއްޖޭގެ ގިނަ ތަޖުރިބާކާރުން ބައިވެރިވެފައިވެ އެވެ. މީގެ އިތުރުން އޮކްސްފޯޑް ޓޫރިޒަމް އިކޮނޮމިކްސް އަދި އީޓޫރިޒަމް ފްރޮންޓިއާސްއިން ޓޫރިޒަމް ސިނާއަތުގައި ޑޭޓާގެ މުހިންމުކަމާ ބެހޭ ގޮތުން ވާހަކަދައްކާފައިވެއެވެ.
ޝިއުރީ ވިދާޅުވި ގޮތުގައި ޓޫރިޒަމް ފަދަ މުހިންމު ސިނާއަތަކަށް ޑޭޓާއާ ބެހޭ މައުލޫމާތަކީ އެ ސިނާއަތުގެ ސިޔާސަތުތައް ކަނޑައެޅުމަށް މުހިންމު މައުލޫމާތު ތަކަކަށް ވެގެންދާނެއެވެ. އަދި މި ފޯރަމްގެ ސަބަބުން ޑޭޓާ ބޭނުންކުރާނެ ގޮތް ދަސްވެ، ޓޫރިޒަމް ސިނާއަތަށް ހެޔޮ ބަދަލުތަކެއް ފެނިގެންދާނެ ކަމަށް އުންމީދު ކުރައްވާ ކަމަށް ވެސް ވިދާޅުވިއެވެ. މި ފޯރަމްގައި ޖުމްލަ 150 ފަރާތަކުން ބައިވެރިވެފައިވާ ކަމަށް ވެސް މައުލޫމާތު ލިބިފައިވެއެވެ.
