ކަނދުރާގެ އޮޕަރޭޝަނަކަށް ފަހު ބޮޑު ސިސްޓެއް ނަގާފައިވާއިރު، ސެރީނާ ވިލިއަމްސްގެ ހާލު ރަނގަޅު ކަމަށް އޭނާވަނީ ޓިކްޓޮކްގައި އާއްމު ކުރި ވީޑިއޯއެއްގައި ބުނެފައެވެ.
ސެރީނާ ވިލިއަމްސްގެ ކަނދުރާއިން ބޮޑު ސިސްޓެއް ނެގިއިރު، ކަނދުރާގައި މައްސަލައެއް އުޅޭކަން އޭނާއަށް އެންމެ ފުރަތަމަ ފާހަގަ ކުރެވިފައިވަނީ މި އަހަރުގެ މޭ މަހުގެ ތެރޭގައެވެ.
އޭރު އެންމެ ފުރަތަމަ އޭނާ ބެލީ އޮޕަރޭޝަން ނުކޮށް ކަނދުރާގެ ކަންތައް ހައްލުވާނެ ކަމަށެވެ. އެންމެ ފުރަތަމަ ޑޮކްޓަރުންވެސް އެ ގޮތަށް ލަފާދިންނަމަވެސް ފަހުން ޑޮކްޓަރުން ލަފާދީފައިވަނީ އޮޕަރޭޝަން ކޮށްގެން ސިސްޓު ނެގުމަށް ކަމަށް ރިޕޯޓްތައް ބުނެއެވެ.
ޑޮކްޓަރުންގެ އިރުޝާދާ އެއް ގޮތަށް ސެރީނާ ވިލިއަމްސްވަނީ އޮޕަރޭޝަންކޮށްގެން "ގްރޭޕް ފުރުޓެއް" ވަރަށް ބޮޑުވެފައިވާ ސިސްޓް ނަގައިފައެވެ.
23 ގްރޭންޑް ސްލޭމް ހޯދާފައިވާ ޓެނިސް ލެޖެންޑް ބުނެފައިވަނީ އޭނާގެ ހާލު މިހާރު މުޅިން ރަނގަޅު ކަމަށެވެ. އުމުރުން މިހާރު 43 އަހަރުގެ ސެރީނާ ވިލިއަމްސް ޕްރޮފެޝަނަލް ޓެނިސް ކުޅުންވަނީ 2022 ވަނަ އަހަރު ހުއްޓާލާފައެވެ.
