އެންމެ ފަހުން ހިފެހެއްޓި މަސްތުވާތަކެއްޗަކީ 2.05 ކިލޯގެ ހެރޮއިނެވެ. މި ތަކެތި ހިފެހެއްޓީ އޮކްޓޯބަރު މަހުގެ 15 ވަނަ ދުވަހު ވެލާނާ އިންޓަނޭޝަނަލް އެއަރޕޯޓުންނެވެ.
މީގެ ކުރިން މި މަހުގެ ފަސްވަނަ ދުވަހު ކަސްޓަމްސްއިން ވަނީ 2.4 ކިލޯގެ ކޮކެއިން ޝިޕްމަންޓެއް ހިފަހައްޓާފައެވެ. އަދި ހަތްވަނަ ދުވަހު 1.04 ކިލޯގެ ހެރޮއިން ޝިޕްމަންޓެއް ހިފަހައްޓާފައިވެއެވެ. މި ދެ ޝިޕްމަންޓުވެސް ހިފެހެއްޓީ ވެލާނާ އިންޓަނޭޝަނަލް އެއަރޕޯޓުންނެވެ.
ކަސްޓަމްސްއިން މިފަދަ މަސްތުވާތަކެތި ހިފެހެއްޓުމަށްފަހު އާންމު ގޮތެއްގައި އެ ތަކެތި ހަވާލުކުރަނީ މޯލްޑިވްސް ޕޮލިސް ސާވިސްއާއެވެ. އޭގެ ފަހުން ފުލުހުން ކޮންޓްރޯލްޑް ޑެލިވަރީ އޮޕަރޭޝަންތައް ހިންގައި، އެ މައްސަލަތަކުގައި ޝާމިލުވާ އިތުރު މީހުން ދެނެގަނެ އަތުލައިގަތުމަށް މަސައްކަތް ކުރެއެވެ.
މި މަހު މިހާ ގިނަ އަދަދަކަށް މަސްތުވާތަކެތި ހިފެހެއްޓިފައިވުމާ ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. ނަމަވެސް ކަސްޓަމްސްއިން ބުނީ މިއީ އެ އިދާރާގެ މުވައްޒަފުންގެ ހުނަރުވެރިކަމާއި ވިސްނުންތެރިކަމުގެ ސަބަބުން ކުރެވުނު ކާމިޔާބު މަސައްކަތްތަކެއް ކަމަށެވެ. އަދި ކުރިއަށް އޮތް ތަނުގައިވެސް މިފަދަ މަސައްކަތްތައް ހަރުދަނާކޮށް ކުރިއަށް ގެންދާނެ ކަމަށް އެ އިދާރާއިން ބުންޏެވެ.
